شێف نوسرەت لە لێواری مایەپووچبووندایە

SNN

زنجیرە چێشتخانەکانی شێف نوسرەت لە کێشەیەکی دارایی قورسدایە و خاوەنە ئەسڵییەکەی نایەوێت 2.7 ملیار دۆلار قەرز بداتەوە.

زنجیرە چێشتخانەکانی شێف نوسرەت گوکچە کە بە (خوێ رشێنەکە) ناوزەد کراوە، تووشی بارقورسییەکی دارایی گەورە بۆتەوە، لەبەرئەوەی ئەو بانکەی قەرزی داوە بۆ پەرەپێدانی چێشتخانەکە، داوای پارەکەی دەکاتەوە کە بڕەکەی 2.7 ملیار دۆلارە و خاوەنەکەشی نایەوێت بیداتەوە.

گروپی کۆمپانیاکانی (دۆکوس هۆڵدینک) کە سپۆنسەری زنجیرە چێشتخانەکانی نوسرەتن، بەهۆی کۆرۆناوە تووشی بێکاریی و بێ پارەیی هاتوون.

سایتی بلومبێرگ لە زاری سپۆنسەرەکانەوە دەڵێت: “ئەوان وتوویانە ناتوانن پارەی قەرزی سەر چێشتخانەکە بدەنەوە، کە بیانووەکەیان ئەوەیە بەهۆی کۆرۆناوە زیانیان کردووە”.

گروپەکە کە فەرید شەهینک سەرۆکێتی و بارەگاکەی لە ئیستانبوڵە، ئەمساڵ 17٪ رێژەی قەرزەکانیان بەرز بۆتەوە و بۆ 5.2 ملیار دۆلار زیادیکردووە.

گروپی کۆمپانیاکانی دوکوس هۆڵدینگ ساڵی پاریش چەندین پرۆژەی وەبەرهێنانی خۆی لە ئیسپانیا و ئەمریکا فرۆشت تا قەرزەکانی بداتەوە.

زنجیرە چێشتخانەکانی شێف نوسرەت گوکچە بەوە بەناوبانگە کە ناودارانی جیهان بۆ خواردنی ستیکەکانی لە هەموو جیهانەوە سەردانی لقەکانی دەکەن لە تورکیا و ئیمارات و ئەوروپا تا خوێ رژاندنەکەی نوسرەت ببینن کە بۆتە نەریتێکی جیاواز بۆ ناوبراو.