هێزێکی یەکەی 80 دەچێتە سنووری باڵەكایەتی کە پێش شەڕی داعش لەوێ جێگیر کرابوون

SNN-  بریار محەمەد

لە بەرەبەیانی ئەمڕۆوە هێزێكی زۆر بە ئۆتۆمبێلی سەربازیی و چەكی قورسەوە ڕەوانەی حاجی ئۆمەران و قەسرێی سنووری باڵەكایەتی لە پارێزگای هەولێر کراون.
سەرچاوەیەكی ئاگادار لە باڵەكایەتی و چۆمانەوە بە SNNی راگەیاند “بەریانی ئەمڕۆ هەریەكە لە فەرماندەی هەڵگورد و تۆپخانەی شەقڵاوەی سەر بەیەكەی 80ی هێزەكانی پێشمەرگە ڕەوانەی قەزای ناحیەی چۆمان و قەسرێ لە سنووری باڵەكایەتی كراون”.

وتیشی: “پێشتر هەموو ئەو هێزانە لەو ناوچانە بوون، بەڵام دوای هاتنی داعش بۆ بەرەكانی شەڕ گواسترانەوە، ئێستا دووبارە هاتوونەتەوە ئەو شوێنانەی كە پێشتر لێی بوون و لە چەندین كۆنە سەنگەری سەردەمی شەڕی ناوخۆ جێگر كراون”.

لیوا حەسەن نوری بەڕێوەبەری راگەیاندنی هێزەكانی یەكەی 80 بە SNNی راگەیاند “ئەو ئاگاداری ئەو باتە نییە و هۆكاری چوونی ئەو هێزانەش بۆ ئەو ناوچەیە نازانێت” .

شایانی باسە زیاتر لە دوو مانگە بەهۆی بارگرژییەكانی نێوان پارتی دیموكراتی كوردستان و پارتی كرێكارانی كوردستان، پارتی بەردەوامە لە گواستنەوەی هێزەكانی بە چەكی قورس و مام ناوەندەوە بۆ ئەو شوێنانەی هێزەكانی پەكەكەی لێیە و تاوەكو ئێستاش هیچ رووبەڕووبوونەوەیەک لەنێوان هەردوولا رووینەداوە .