هەڵوێستی یاریزانانی ریاڵ  مەدرید بۆ دوورخستەوەی زیدان ئاشکرابوو

SNN Sport

پاش شکستەکەی بەرامبەر بە یانەی شاختار لە خولی یانە پاڵەوانەکانی ئەوروپا 2-0، دەنگۆی دوورخستنەوەی زیدان راهێنەری یانەی ریاڵ مەدرید هەیە و بە پێی راپۆرتی ئەمڕۆی رۆژنامە ئیسپانییەکان، یانەی ریاڵ مەدرید بیر لە دوورخستنەوەی ئەم راهێنەرە دەکەنەوە،بەڵام یاریزانەکان لە ئێستادا دژی ئەوەن.

بە پێی زانیارییەکانی رۆژنامەی مارکا، یاریزانانی یانەی ریاڵ مەدرید هەڵوێستی خۆیان روونکردووەتەوە، ئەوان نایانەوێت زیدان لە پۆستەکەی لاببرێت و دەیانەوێت لە پۆستەکەی بەردەوام بێت، زیدان و یاریزانەکان متمانەیان بە خۆیان هەیە ئەم دۆخە لە نزیکترین کاتدا بگۆڕن و یانەکە بگەڕێتەوە بۆ رێڕەوی بردنەوەکانی، ئەمەش پاش دوو شکستی لەسەر یەک لە لالیگا و خولی یانە پاڵەوانەکان دژی ئەلاڤێس و شاختار.

رایۆی کادێنا کۆپیش بڵاویکردووەتەوە، ئەگەر یانەی ریاڵ مەدرید نەگاتە قۆناغی داهاتووی خولی یانە پاڵەوانەکان، ئەوە زیدان لە پۆستەکەی لادەبرێت.

هەر بە پێی زانیاری رۆژنامەکان، لە ئەگەری دوورخستنەوەی زیدان لە پۆستەکەی، یانەکە پۆچتینۆی ئەرجەنتینی یان رائول گۆنزالێز لە شوێنەکەی دادەنێت.

یانەی ریاڵ مەدرید لە جەولەی شەشەم و کۆتایی خولی یانە پاڵەوانەکان رووبەڕووی یانەی مونشنگلادباخی ئەڵمانی دەبێتەوە، کە ئەم یانەیە لە 5 یاری رابردوو 8 خاڵی هەیەو یەکەمی گروپی دووەمە، ریاڵ مەدرید بە 7 خاڵ پلەی دووەمی گروپەکەی گرتووە.

لە لالیگا ریاڵ مەدرید لە 10 یاری 17 خاڵی کۆکردووەتەوە و لە پلەی چوارەمی ریزبەندی دەبینرێت.