فۆرد تا 2030 بەشێکی زۆری ئۆتۆمبێلەکانی دەکاتە کارەبایی

SNN

کۆمپانیای فۆرد بۆ دروستکردنی ئۆتۆمبێل بە نیازە تا نۆ ساڵی تر رێژەی 40٪ی تواناکانی بۆ بەرهەمهێنانی ئۆتۆمبێلی کارەبایی تەرخان بکات.

بەپێی پلانی کۆمپانیاکە تا ساڵی 2025 بڕی 8 ملیار دۆلار وەبەرهێنان بۆ دروستکردنی ئۆتۆمبێلی کارەبایی زیاد دەکەن، بەمەش کۆی سەرمایەی ئەو کۆمپانیایە دەگاتە 20 ملیار دۆلار.

هەر بۆ ئەو مەبەستە لە پێناو پەرەپێدان بە باتری ئۆتۆمبێلە کارەباییەکان فۆرد و کۆمپانیای ئێس کای کۆریای باشور کۆمپانیایەکی هاوبەش دادەمەزرێنن.

لەئێستادا ئۆتۆمبێلی کارەبایی رێژەی 1.2٪ی کۆی فرۆشتنی ئۆتۆمبێلەکانی فۆرد پێکدەهێنێت و تەنها ئۆتۆمبێلی موستانگ ماک ئای ئەو کۆمپانیایە بە تەواوەتی کارەباییە و بڕیارە ساڵی داهاتوو ئۆتۆمبێلێکی دەیکەی کارەباییش بخاتە بازاڕەوە.

لەپێناو کەمکردنەوەی پیسبوونی هەوا و رووبەڕووبوونەوەی دیاردەی گەرمبوونی زەوی خواست لە سەر دروستکردنی ئۆتۆمبێلی کارەبایی زیاد بووە و ساڵی رابردوو سێ ملیۆن و 240 هەزار ئۆتۆمبێلی کارەبایی لەسەرتاسەری جیهان فرۆشراون، کە بەراورد لەگەڵ ساڵی 2019 بە رێژەی 43٪ بەرزبووەتەوە.

زۆرترین فرۆشتنی ئۆتۆمبێلی کارەبایی لە یەکێتی ئەوروپا، چین و ئەمریکایە.