ئەمڕۆ کەشتییەک بە 13 کۆچبەرەوە لە نزیک یۆنان بەلەمەکەیان نقومبووە
ژمارەیەک کۆچبەر لە ناو ئاودا
SNN-عەلی حەمە سەعید
سەرۆكی دەزگای لوتكە بۆكاروباری ئاوارە و پەنابەران ئاماژە بەوەدەكات ئەمڕۆ بەلەمێك بە 13 كۆچبەرەوە لە دوورگەیەكی نزیك كەنارە ئاوییەكانی یۆنان نقومبوو كە خۆشبەختانە تواندراوە 10 كۆچبەریان ڕزگار بكرێن.
ئاری جەلال، سەرۆكی دەزگای لوتكە بۆكاروباری ئاوارە و پەنابەران بە SNNی ڕاگەیاند: بەداخەوە ئەمڕۆش لە بەلەمێكی دیكەی كۆچبەران لە نزیك كەناراوە ئاوییەكانی یۆنان نوقم دەبێت، دوای ڕووداوەكەش ئێمە لە دەزگای لوتكە پەیوەندیمان لەگەڵ بەرپرسی كەمپی پەنابەرانی دوورگەی لیسبوس كردوو هەواڵەكەی بۆ ئێمە پشتڕاست كردەوە، كە بەگوێرەی زانیارییەكان ئەو بەلەمە بە 13 كۆچبەرەوە لە نزیك دوورگەی لیسبۆسی یۆنان ژێر ئاو كەوتووە.
ئاماژەی بەوەشكرد، هەر بە گوێرەی زانیارییەكانی نوێنەرمان لە دورگەی لیسبوس لەو 13 كۆچبەرە لەلایەن هێزەكانی دەریاوانی یۆنان تواندراوە 10 كۆچبەریان ڕزگار بكرێن بەڵام تا ئێستا چارەنووسی سێ لە كۆچبەرەكان بەنادیاری ماوەتەوە، هاوكات هەوڵەكان بەردەوامن بۆ دۆزینەوەی ئەو كۆچبەرانەی كە تا ئێستا چارەنوسیان نادیارە.
سەرۆكی دەزگای لوتكە ئەوەشی خستەڕوو، تا ئێستا ڕەگەزنامەی ئەو كۆچبەرانە ڕوون نەبووەتەوە ئاخۆ كۆچبەری عێراق و هەرێمی كوردستانن یان وڵاتێكی دیكە، بۆیە ئێمە لە هەوڵەكانمان بەردەام دەبین بۆ ئاشكراكردنی چارەنووسی ئەو كۆچبەرانەی كە تا ئێستا نادیارن و هەروەها دیاریكردنی ڕەگەزنامەو خەڵكی چ وڵاتێكن.
