لە پێنج کاتژمێردا 12 جار بومەلەرزە لە چەند ناوچەیەکی کوردستان روویدا

SNN

پاشنیوەڕۆی ئەمڕۆ 12 بومەلەرزە کە گوڕی زۆرینەیان لە سەرووی سێ پلە بە پێوەری ریختەرەوە بوو سێ ناوچەی باشور و رۆژهەڵاتی کوردستانیان هەژاند.

ناوەندی بومەلەرزەزانی زانکۆی تاران بڵاوی کردەوە، پاشنیوەڕۆی رۆژی شەممە لە ماوەی پێنج کاتژمێردا 12 بومەلەرزە ناوچەکانی خانەقین، کفری و قەسری شیرینیان هەژاندووە.

روونیشیکردوەتەوە، گوڕی هەشت لەو بومەلەرزانە لە سەرووی سێ پلە بە پێوەری ریختەرەوەبوون، کە بەهێزترینیان 3.7 پلە بووە .

روودانی ئەو ژمارە زۆرە لە بومەلەرزە لە ماوەیەکی کەمدا، بە ئاماژەیەک بۆ ناجێگیری پلێتەکانی نێوان ئەو سێ ناوچەیەی باشور و رۆژهەڵاتی کوردستان دادەنرێت.