ئێران بۆ سێیەم رۆژ لەسەر یەک ناوچە سنوورییەکان بۆردومان دەکات

SNN

بۆ سێیەم ڕۆژ لەسەریەک ئێران بۆردومانی ناوچە سنوورییەکانی هەرێمی کوردستانی کردەوە و حزبی دیموکراتی کوردستانیش هۆشداری لە هێرشی زەمینی ئێران بۆسەر هەرێم دەدات.

بەپێی زانیارییەکان، تۆپبارانەکانی ئەم بەیانییە 11ی یەیلول، هیچ زیانێکی گیانی لێ نەکەوتووەتەوە بەڵام ترس و دڵەڕاوکێی لای خەڵکی ناوچەکە دروستکردووە، هەروەها چەند خێزانێک ناوچەکەیان چۆڵ کردووە.

میدیای حزبی دیموکراتی کوردستانی ئێران دەڵێت، هێڵی تەلەفۆن و تەنانەت ئینتێرنێتی شارە سنوورییەکانی ڕۆژهەڵاتی کوردستان وەکوو سەقز، پاوە، مەریوان، بانە، پیرانشار و شنۆ و هەروەها ئینتێرنێتی ماڵان لە سەردەشت دابڕاوە یان خێراییەکەی دابەزیوە.

دەشڵێت، سوپای پاسداران چەند هێزێکی تایبەتی لەسەر سنووری شارەکانی شنۆ و پیرانشار بە تەواوی ئامێر و کەرەستەی شەڕ و چەکی قورس و نیوە قورس جێگیر کردووە کە پیشاندەری ئەگەری هێرش لە زەوییەوە لەلایەن هێزەکانی ڕژێم بۆ سەر ناوچەی برادۆست لە هەرێمی کوردستانە.

دوێنێ هەینی، 10ی ئەیلول، حزبی دیموکراتی کوردستانی ئێران ڕایگەیاند، فڕۆکەیەکی بێ فڕۆکەوانی ئێرانیان خستووەتەخوارەوە، لەدوای هەڕەشەکانی سوپای پاسداران بۆ هێرشکردنەسەر و بۆردومانکردنی حزبە کوردییەکانی ڕۆژهەڵاتی کوردستان لە هەرێمی کوردستان، بۆ ڕۆژی سێیەم لەسەریەک ئێران بۆردومانی ناوچە سنوورییەکانی لەگەڵ هەرێمی کوردستان کرد.