ئه‌و منداڵه‌ى له‌لایه‌ن دایكییه‌وه فڕێدرابوو درایه‌وه به باوكى
موقه‌ده‌م به‌رزان عوسمان، وته‌بێژى به‌ڕێوه‌به‌رایه‌تى پۆلیسى هه‌ڵه‌بجه | فۆتۆ: SNN
SNN/ عەلی حەمەسەعید
به‌ڕێوه‌به‌رایه‌تى پۆلیسى هه‌ڵه‌بجه رایگه‌یاند، ئه‌و منداڵه‌ى له‌لایه‌ن دایكییه‌وه فڕێدرابوو و راده‌ستى باوكى كرایه‌وه و دایكشى ده‌ستبه‌سه‌ركرا.
ئه‌مڕۆ پێنجشه‌ممه 18ى ئاب، به‌ڕێوه‌به‌رایه‌تى پۆلیسى پارێزگاى هه‌ڵه‌بجه رایگه‌یاند، “له چه‌ند رۆژى رابردوودا له سه‌یرانگاى ئه‌حمه‌د ئاوا و ناحیه‌ى خورماڵ منداڵێك دۆزرایه‌وه و پاش به‌دواداچوون ده‌ركه‌وت كه دایكى ده‌ستبه‌ردارى بووه، ئێمه‌ش پاش لێكۆڵینه‌وه راده‌ستى باوكیمان كرده‌وه كه خه‌ڵكى خوارو و ناوه‌ڕاستى عێراقه”.
به‌پێى زانیارییه‌كانى پۆلیسى پارێزگاى هه‌ڵه‌بجه، “دایكى منداڵه‌كه و ئه‌و كه‌سه‌ى كه له‌گه‌ڵى بووه ده‌ستگیر كراون و له ئێستادا ده‌ستبه‌سه‌رن، هه‌رچه‌نده دایكه‌كه له‌كاتى لێكۆڵینه‌وه‌دا وتویه‌تى: بێتاقه‌تبووم بۆیه ئه‌و كاره‌م كردووه”.
به‌پێى زانیارییه‌كانى SNN، “ئه‌و دایكه پلانى ئه‌وه‌ى هه‌بووه له‌گه‌ڵ ئه‌و پیاوه‌ى له‌گه‌ڵى بووه منداڵه‌كه له به‌رامبه‌ر بڕێك پاره بداته‌وه به هاوسه‌ره‌كه‌ى، به‌ڵام كه نه‌یتوانیووه ئه‌و كاره بكات ده‌ستبه‌ردارى منداڵه‌كه‌ى بووه”.
