بافڵ جەلال تاڵەبانی پێشوازی لە جینین پلاسخارت کرد

SNN

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیکرد لە جێنین پلاسخارت، نێردەی تایبەتی سکرتێری گشتی نەتەوە یەکگرتووەکان لە عیراق.
لە دیدارێکدا پێشھات و پەرەسەندنە سیاسییەکان، دۆخی چەقبەستووی سیاسی عیراق و یەکخستنی ھەوڵەکان بۆ دیالۆگ و گفتوگۆی نیشتمانی تاوتوێکران و بۆچوونیان لەبارەوە خرایەڕوو.

سەرۆک بافڵ جەلال تاڵەبانی لە دیدارەکەدا جەختی لە چارەسەرکردنی دەستووریانە و سیاسییانەی کێشەکان کردەوە و رایگەیاند، یەکێتیی نیشتمانیی کوردستان پشتگیر و ھەماھەنگە بۆسەرخستنی گفتوگۆی نیشتمانی بونیادنەرانە بە بەشداری ھەموولایەنە سیاسییەکان کە ببێتە ھۆی دەربازبوونی وڵات لەو دۆخە نەخوازراوەی تێیکەوتووە.

لە بارەی دۆخی ھەرێم، پرسی ھەڵبژاردن و ئەگەرەکان بافڵ جەلال تاڵەبانی ھەڵوێستی یەکێتیی نیشتمانیی کوردستانی خستەڕوو، ئاماژەی بۆئەوە کرد یەکێتی بەھیچ شێوەیەک لەگەڵ دواخستنی ھەڵبژاردن نەبووە بەڵام دەمانەوێت یاسایەکی سەردەمیانەمان ھەبێت کە لەگەڵ دۆخی ھەرێم بگونجێت و کۆدەنگی نیشتمانی لەسەربێت چونکە پرسێکی وەھا گرنگ و چارەنووساز پێویستی بە سازان و رێککەوتنی ھەموولایەنەکانە.