لە هەولێر رێگە بە ئەنجامدانی فێستیڤاڵی هەنار نادرێت
SNN-عەلی حەمەسەعید
لەگەڵ ئەوەی لەچەند ساڵی ڕابردوو هاوشێوەی پارێزگای هەڵەبجە لە پارێزگای هەولێریش فێستڤاڵی هەنار بەڕێوەچووە، بەلام ئەمساڵ لەلایەن قائیمقامی ناوەندی هەولێرەوە رێگە بە جوتیارە نمونەییەكەی هەڵەبجە نادرێت فێستیڤاڵی هەنار لەو پارێزگایە ئەنجام بدات، جوتیارە نمونەییەكەش دەڵێت” با ڕێگەمان پێنەدەن ئێمەش ناچین و سبەینێ لە شاری سلێمانی فێستیڤاڵەكەمان ئەنجامدەدەین”.
ئازاد محەمەد، جوتیارە نمونەییەكەی هەڵەبجە بە SNN-ی ڕاگەیاند:”هەرچەندە پلانمان دانابوو كە ئەمساڵیش هاوشێوەی ساڵانی ڕابردوو لە شاری هەولێر فێستیڤاڵی هەنار ئەنجام بدەین، بەڵام لەلایەن قائیمقامی ناوەندی پارێزگای هەولێرەوە ڕێگەمان پێنادرێت ئەنجامی بدەین ئەوەش بە بیانووی ئەوەی گوایە لە فێستیڤاڵەكەی ساڵی ڕابردوو هەناری خراپمان بردووە بۆ فێستیڤاڵەكە.
ئاماژەی بەوەشكرد:”ئەوەی دەوترێت لەسەر ئێمە ڕاست نییە، چونكە هاووڵاتییان و بەشداربووانی فێستیڤاڵەكەی ساڵانی ڕابردوو دەزانن چ بەرهەمێكمان بردووەتە ڤیستیڤاڵەكە و بۆ ئەمساڵیش پێمان خۆش بوو خزمەتێكی هاووڵاتییانی شاری هەولێربكەین، بەڵام كە ڕێگریمان لێبكرێت و نەهێڵن فێستیڤاڵەكە سازبكەین زۆرئاساییە ئێمەش ناڕۆین”.
جووتیارە نموونەییەکەی هەڵەبجە ئاماژەی بەوەشکرد:”ئامادەكاری تەواومانكردووە سبەی لە شاری سلێمانی لە (میلی مۆڵ) هەمان ئەو هەنارەی ئامادەمان كردبوو بۆ فێستیڤاڵی هەناری هەولێر دەیبەینە سلێمانی و لەوێ بەرهەمەكانمان دەخەینە ڕوو”.
