هەولێر؛ وردەکاری کوشتنی ئەو پیاوەی لەلایەن ژنەکەیەوە بە چەکوش کوژرا و دواتر سوتێندرا

SNN-

پۆلیسی هەولێر رایگەیاند، شەوی رابردوو لە گەڕەکی هەڤاڵانی شاری هەولێر ژنێک دوای ئەوەی هاوسەرەکەی بە چەکوش کوشتووە دواتر بردویەتییە گەرماوی ماڵەکەیان و سووتاندویەتی.

هۆگر عەزیز، وتەبێژی پۆلیسی هەولێر لە کۆنفرانسێکی رۆژنامەوانیدا رایگەیاند، کاتژمێر 10:25 خولەکی شەوی رابردوو لە گەڕەکی هەڤاڵانی شاری هەولێر ژنێک هاوسەرەکەی خۆ بە ناوی (ئەحمەد جەواد)ی تەمەن 43 ساڵ بە چەکوش دەکوژێت و دواتر بردوویەتییە نێو گەرماوی ماڵەکەی و سووتاندویەتی.

دەشڵێت:” ئەو ژنە بە رەگەز عەرەبە و تەمەنی 29 ساڵە، سەرەتا بە چەکوش لێیداوە دواتر بردوویەتییە ناو گەرماوی ماڵەکە و سووتاندویەتی، دوای رووداوەکە لە ماڵ دەرچووە بۆ چەند کاتژمێرێک دواتر دوای گەڕانەوەی خەڵکی ئاگادارکردووەتەوە کە هاوسەرەکەی خۆی سوتاندووە.

سەبارەت بە هۆکاری رووداوەکەش پۆلیسی هەولێر دەشڵێت:”هۆکارەکەی بۆ کێشەی خێزانی نێوانیان دەگەڕێتەوە کە ماوەی حەوت ساڵە هاوسەرگیرییان ئەنجامداوە و خاوەنی دوو منداڵن”.