كۆتایی ئه‌م هه‌فته‌یه شه‌پۆلى بارانبارین ده‌ستپێده‌كات
بارانبارینى به‌خوڕ | فۆتۆ: Truth-Seeker
SNN
شاره‌زایه‌كى كه‌شناسى عێراقى رایده‌گه‌یه‌نێت، كۆتایی ئه‌م هه‌فته‌یه و سه‌ره‌تاى هه‌فته‌ى داهاتوو شه‌پۆلێكى بارانبارینى به‌خوڕ روو له شاره‌كانى عێراق ده‌كات، ده‌ڵێت: “له‌گه‌ڵ شه‌پۆلى باران ره‌شه‌باش هه‌ڵده‌كات”.
ئه‌مڕۆ سێشه‌ممه 15ى ئایار، عه‌لى جابرى، شاره‌زاى كه‌شناسى عێراق رایگه‌یاند، “كۆتایی ئه‌م هه‌فته‌یه و سه‌ره‌تاى هه‌فته‌ى داهاتوو شه‌پۆلێكى بارانبارین ناوچه شاخاوییه‌كانى عێراق ده‌گرێته‌وه. هاوكات، له‌گه‌ڵ بارانبارینه‌كه ره‌شه‌با و خۆڵبارینیش رووده‌دات”.
له‌باره‌ى به‌رده‌وامى شه‌پۆلى بارانبارین ئه‌و شاره‌زایه‌ى بوارى كه‌شناسى ئه‌وه‌شده‌خاته‌ڕوو، “تاوه‌كو كۆتایی مانگ كه‌شوهه‌وا ئاسایی نابێته‌وه، به‌ڵكو بارانى ناوبه‌ناو و ڕه‌شه‌با به‌رده‌وام ده‌بێت”.
پێشتر سادق عه‌تیه، شاره‌زاى كه‌شناسى رایگه‌یاند، “كۆتایی ئه‌م هه‌فته‌یه شه‌پۆلى بارانبارین زۆرینه‌ى ناوچه‌كانى عێراق ده‌گرێته‌وه، دواتر ورده ورده پله‌كانى گه‌رما ده‌ستبه به‌رزبوونه‌وه ده‌كه‌ن”.
