610 خاوەن نانەواخانەی شاری هەولێر مانیان گرت

SNN-

کاردانەوەکان لەبەرامبەر هەرزانکردنی نان لە شاری هەولێر بەردەوامی هەیە و ئەمڕۆش 610 نانەواخانەی شارەکە وەک ناڕەزایەتییەک دژی بڕیارەکە کاریان نەکردووە.

لە بەیاننامەیەکدا خاوەن نانەواخانەکانی هەولێر کە ئاڕاستەی سەرۆکی سەرۆكی حكومەتی هەرێمی كوردستانیان کردووە دەڵێن:”ئێمە وەكو خاوەنی 610 نانەواخانەی هەولێر كە ئەمڕۆ كارمان نەكردوە بەهۆی ئەو هەموو فشارەی لەسەرمانە، دەست خراوەتە گیرفانمان و چاو بڕاوەتە نانی دەمی منداڵەكانمان، تكامان وایە ئەو بڕیارە بە بەرپرسانی هەولێر رابگرە چونكە بەڕاستی ئەوان رێنادەن كار بكەین”.

دەشڵێن:”ئێمە دەمانەوێت كاری خۆمان بكەین راستە ئێستا ئارد هەزران بووە، بەڵام كاتێك شەڕی ئۆكراینا و رووسیا بوو فەردەیەكی ئاردمان بە 45 هەزار دینار دەكڕی ئەو كات بۆ ئەوەی كاریگەری لەسەر هاووڵاتیان نەكات ئێمە لە فرۆشتنی نان بە نرخی خۆی بەردەوام بووین، ئێستاش خاوەن نانەواخانە هەیە زیاتر لە 40 ملیۆن دینار قەرزی ئەو كاتەیە، بە نرخی ئاردی ئێستاش نە قازانجە نە زەرەرە”.

لە بەیاننامەکەیاندا ئاماژەیان بەوەشکردووە کە بەپێی ئەو بڕیارەی پارێزگاری هەولێر و قائیمقامی هەولێر جێبەجیی دەكەن دەیانەوێت ئێمە پێشێلی یاسای بكەن، چونكە بەو نرخەی نان دەبێت ئێمە كرێكاری خۆمان دەربكەین و كرێكاری تر بهێنین بۆ شوێنەكانیان ئەمەش پێشێلی یاسای كار و دەستەبەری كۆمەڵایەتییە كە نازانین بۆچی هێندە دژی كرێكاری خۆمان كار دەكەن و رقیان لێیان دەبێتەوە.

لە کۆتایی بەیاننامەکەیاندا دەشڵێن:” ئەمڕۆ 610 نانەواخانە كارمان نەكردووە واتا 1830 كرێكار كاریان نەبووە، ئێمە دژی شاری خۆمان نین، دژی هیچ كەسێك نین، بەڵكو قرقرتۆكمان گیراوە ناهێڵن كار بكەین، ئەو هەموو هەڕەشەیەی لەلایەن بەرپرسانی هەولێر لێمان دەكرێت بەناوی تۆوە، بۆیە تكامان وایە خۆت بیانوەستێنە چیتر بێزارمان نەكەن”.

ئەنجومەنی وەزیران، لە 7ی كانونی یەكەمی رابردوو بڕیاریدا بە هەرزانكردنی نان و سەمون و هەردوو وەزارەتی ناوخۆ و بازرگانی راسپارد بۆ جێبەجێكردنی.

هەفتەی رابردوو، قائیمقامی قەزای ناوەندی هەولێر جێبەجێكردنی بڕیارەكەی بۆ ئەم هەفتەیە راگەیاند و جەختیكردەوە لە بەرامبەردا لەسەدا 50 کرێی کارەبای نانەواخانە و سەمونخانەکان کەم دەکرێتەوە، هەروەها بەهەمان شێوە بریاریدا بڕی پێدانی غاز بەو شوێنانە بۆ لەسەدا 50 كەمبكاتەوە.

هەر لە بڕیارەكەدا هاتووە كە نرخی فەردەی ئاردیان لە 29 هەزار دینارەوە بۆ دەکرێتە 24 هەزار و بۆ هەر تۆنێكیش فەردەیەك ئاردیان بەخۆڕایی پێدەدرێت. ئەوانەشیان وەک پاڵپشتی حکومەت بۆ هەرزانكردنی نان لێكدایەوە.

بەگشتی لە سنوری هەولێر 1800 نانەواخانەو سەمونخانە هەن و بەشێكی كەم لە ئەوان چونە بەردەم بینای پارێزگای هەولێر و دژی بڕیارەكە وەستانەوە.

ئاسایشی هەولێر بەبێ بڕیاری دادوەر و بەبێ ئەوەی “هیچ پەڕاوێك” بۆ ئیدریسی نانەوا بكاتەوە، ناوبراویان بۆ ماوەی 18 سەعات دەستگیركرد، هەر بەبێ بڕیاری دادوەریش ئازادكرا، دوای ئەوەی ناڕەزایی لە دەستگیركردنەكەی تۆڕە كۆمەڵایەتییەكانی تەنی.

ئیدریس مەسعود (ئیدریسی نانەوا)، رۆژی دووشەممە 8ی کانونی دووەم، ژمارەیەك خاوەن نانەواخانە و سەمونخانە، لەبەردەم بینای پارێزگای هەولێر گردبونەوە، دژی هەرزانكردنی نرخی نان لە هەشت نان بە هەزار دینارەوە بۆ 10 نان بە هەمان نرخ و ئیدریس مەسعودیش کە خاوەنی یەکێک لە نانەواخانەکان بوو ناڕەزایی توندی دژی بڕیارەکە دەربڕی و رایگەیاند، بە خۆم و منداڵەكەم رۆژانە ئیش دەكەین 35 هەزار دینار پەیدادەكەین، ئەگەر ئەو بڕیارە جێبەجێ بكەم رۆژانە 50 هەزار دینار زەرەر دەكەم، بۆیە ئەگەر تۆ چاكسازیی دەكەیت لە ماڵی خۆت و براو كەسوكاری خۆتەوە دەستپێبكە… بڕۆ لەناو سەرۆك عەشیرەت و جاشەكانەوە دەستپێبكە. بڕۆ لە نەوت و غازەوە دەستپێبكە… بۆ دەبێت تەنیا فەقیر باجەكەی بدات؟”.