خشتەکانی پلە بەرزکردنەوەی ئەفسەرانی هێزی پێشمەرگە گەڕایەوە

SNN-

وەزارەتی پێشمەرگە رایگەیاند، دوای رەزامەندی سەرۆکی هەرێمی کوردستان و سەرۆکی حکومەتی هەرێمی کوردستان، خشتەی پلە بەرزکردنەوەی نەورۆز و ئەیلولی ساڵەکانی 2020 و 2021 و خشتەی نەورۆزی 2022 ئەفسەرانی سەر بە فەرماندەیی هێزەکانی(70، 80) و خشتەی پلە بەرزکردنەوەی ئەیلولی 2022 و خشتەی نەورۆزی 2023ی ئەفسەرانی سەر بەوەزارەتی پێشمەرگە گەرایەوە.

وەزارەتەکە لە راگەیەندراوێکدا دەڵێت:” ئەمڕۆ 1ی شوباتی 2024 دوای بڕینی رێکارە یاساییەکان خشتەی پلە بەرزکردنەوەی ئەیلولی 2022 و نەوڕۆزی 2023 ئەفسەرانی وەزارەتی پێشمەرگە و خشتەی نەورۆز و ئەیلولی هەردوو ساڵەکانی 2020 و 2021، لەگەڵ خشتەی نەورۆزی 2022 ئەفسەرانی سەر بە فەرماندەیی هێزەکانی(70٫80) ی پێشمەرگە و پاشکۆیی خشتەکانی نەورۆز و ئەیلولی ساڵەکانی( 2021٫2020 و نەورۆزی 2022) سەر بەوەزارەتی پێشمەرگە، گەڕایەوە وەزارەتی پێشمەرگە و لەلایەن فەریق روکن عیسا عوزێر سەرۆکی ئەرکانی وەزارەتی پێشمەرگەوە رێکارە ئیداری و کارگێرییەکانی بۆ دەگیرێتەبەر.

لە راگەیەندراوەکەدا هاتووە کە ئەمە نۆیەمین خشتەی پلەبەرزکردنەوەی ئەفسەرانی هێزی پێشمەرگەی کوردستانە کە کارمان لەپێناو هەرچی زوو گەرانەوەیان کردوە و هەموو هەولێکیش دەدەین بۆ ئەوەی بە زووترین کات خشتەکانی پلە بەرزکردنەوەی تەواوی ئەفسەرانی هێزی پێشمەرگە ڕیچکەی یاسایی خۆی وەربگرێت، هاوکات سەرۆکی ئەرکان دڵنیاییدا کە کار بۆ تەواوکردنی خشتەکانی پلە بەرزکردنەوەی هێزی پێشمەرگەی کوردستان دەکرێت و بەپێی پێویست و لەکاتێکی گونجاودا، فەرمانی پلە بەرزکردنەوەیان بۆ دەردەچێت.