بۆردومانێکی ئیسرائیل بۆ سەر دیمەشق کوژراوی لێکەوتەوە

SNN                                   

بەرەبەیانی ئەمرۆ جارێکی دیکە فرۆکە جەنگیەکانی ئیسرائیل ناوچەیەکی نزیک دیمەشقی پایتەختی سوریایان بۆردومان کرد و بەهۆیەوە باس لە کوژرانی سێ کەس دەکرێت، کە یەکێکیان راوێژکاری سەربازی ئێرانە.

میدیاکانی سوریا بڵاویانکردەوە کە فڕۆکە جەنگیەکانی ئیسرائیل ناوچەی سەیدە زەینەبیان لە نزیک دیمەشق بۆردومان کردووە و سیستمی بەرگریی ئاسمانی ئەو وڵاتەش بەرپەچی هێرشەکەی داوەتەوە.

هاوکات روانگەی سوری بۆ مافەکانی مرۆڤ رایگەیاندووە، لە هێرشەکەدا بنکەیەکی سەر بە حزبوڵای لوبنان کراوەتە ئامانج و سێ چەکداری ئەو گروپە کوژراون.

لەلایەکی دیکەوە بەشێک لە میدیا ئێرانییەکان ئاماژەیان بەوەکردووە، کە لەو هێرشەدا راوێژکارێکی سوپای پاسداران کوژراوە.

لە ساڵانی رابردوودا چەندین جار ئیسرائیل لە سوریا بۆردومانی بنکە و بارەگاکانی هێزەکانی سەر بە ئێرانی کردووە و بەهۆیەوە چەند راوێژکارێکی سەربازی سوپای پاسداران و ژمارەیەک لە چەکدارانی گروپەکانی سەر بەو وڵاتە کوژراون.