حوسییەکان کەشتییەکی دیکەیان لە دەریای سور نوقمکرد

SNN

ئەمڕۆ یەکشەممە، 3ی ئازار، فەرماندەیی ناوەندی ئەمریکا بڵاویکردەوە، کەشتی “روبیمار”ی ئەمریکی بەھۆی ھێرشێکی حوسییەکانەوە کە رۆژی 18ی شوبات کراوەتە سەری، بە تەواوی نقوم بووە.

وتیشی، نزیکەی 21 ھەزار تۆن کبریت و فۆسفات و ئەمۆنیۆمی تێدایە، کە مەترسییەکی گەورەی لەسەر ژینگەی دەریای سوور دروست کردووە، ھەروەھا مەترسی لەسەر کەشتییەکانی دیکەش دروست دەکات، کە بەو رێڕەوەدا تێدەپەڕن.

فەرماندەیی ناوەندی ئەمریکا راشیگەیاند، حوسییەکان کە لەلایەن ئێرانەوە پشتیوانی دەکەن، ھەڕەشەیەکی گەورەن بۆ سەر چالاکی دەریایی جیھان، ئەمریکا و ھاوپەیمانەکانیشی پابەندن بە پاراستنی جموجوڵی دەریایی و ھەوڵی جدی دەدەن بۆ سەقامگیری و پاراستنی ئەمنییەتی بازرگانی جیھانی لەڕێی دەریاوە.