کەشناسی پێشبینی شەستە باران و بەفربارین دەکات

SNN

کەشناسی سەبارەت بە کەشوهەوای ئەمڕۆ و سبەینێ رایدەگەیەنێت، شەتە باران و بەفر دەبارێت و لە دهۆک بڕی بارانبارین زیاتر دەبێت.

ئەمڕۆ چوارشەممە 20ی ئازار، بەشی پێشبینی بەرێوەبەرایەتى گشتى کەشناسی و بوومەلەرزەزانى سلێمانی رایگەیاندووە، ئەمڕۆ ئاسمان بەردەوام هەورى تەواو دەبێت، ناوچە شاخاوییەکان  و سنوورى پارێزگاکان بە گشتى نمە باران و شەستە بارانى لە ناکاوى دەبێت، ناوچە سنوورییە بەرزەکان بەفر بارینى کەم هەیە، هاوکات پلەکانی گەرماش بەراورد بە دوێنی دادەبەزن.

ئاماژەی بەوەکردووە، لە پارێزگاى دهۆک و ناوچە شاخاوییەکان بڕى دابارین زیاتر دەبێت و هەندێک کات لەکاتى باران هەورە تریشقەو تەزرە بارین هەیە.

پێشبینییەکانی کەشناسی لەبارەی بڕی باران لە ماوەی 24 کاتژمێری داهاتوودا، ئاشکرایکردووە، لە نێوان (5-10) ملیمەتر لە سەنتەرى پارێزگاکان و لە ناوچە شاخاوییەکان (10-16) ملیمەتر دەبێت، لە سنوورى پاڕێزگاى دهۆک بڕى باران بارینى پێشبینیکراو زیاتر دەبێت لە نێوان (15-25) ملیمەتر.

سەبارەت بە کەشی سبەینێ پێنجشەممە رایگەیاندووە، ئاسمان نیمچە هەور و ناوچە شاخاوییەکان هەورى تەواو دەبێت لەگەڵ ئەگەرى دروستبوونى تەم لەسەر ناوچە شاخاوییەکان  لە کاتەکانى بەیانى، سەبارەت بە باران بارین لە سنوورى پارێزگاى دهۆک و ناوچە شاخاوییەکانى ئەو پارێزگایە بڕى دابارین مامناوەند دەبێت، ناوچەکانى تر بە گشتى ئەگەرى نمە بارانى کورت خایەن هەیە زیاتر ئاسمان نیمچە هەورى دەبێت بە تایبەت لە دواى نیوەڕۆ ، پلەکانی گەرماش بەراورد بە ئەمڕۆ بەرز دەبنەوە.

بەرزترین پلەکانی گەرمای پێشبینیکراو بە پلەی سیلیزی

هەولێر :  16

سلێمانی :15

دهۆک :   13

زاخۆ  : 14

هەڵەبجە : 16

کەرکوک : 18

سۆران : 12

حاجی ئۆمەران : 6

گەرمیان : 20