عەبدوڵای حاجی مەحمود: كوڕەكەم ناردەوە لە گوڵەخانە جەژن بكات بەڵام هێرشیان كردەسەری
SNN-عەلی حەمە سەعید
لەدوای بەڕێوەچوونی كۆنگرەی هەشتەمی پارتی سۆسیال دیموكراتی كوردستان ئێوارەی ئەمڕۆ گرژی و ئاڵۆزی لەنێوان هێزەكانی محەمەدی حاجی مەحمود و عەبدوڵای برای ڕوویداو لەو گرژیانەشدا كوژراو بریندار هەیە، عەبدوڵای حاجی مەحمودیش دەڵێت، كوڕەكەم ناردەوە لە گوڵەخانە جەژن بكات بەڵام هێرشیان كردە سەری و برینداریان كردووە.
عەبدوڵای حاجی مەحمود، جێگری پێشووی سەرۆكی پارتی سۆسیال دیموكراتی كوردستان بە SNNی ڕاگەیاند: دوای ئەوەی لەلایەن ئاسایشەوە ئەو خانووەی كە لە گوڵەخانەیە لەلایەن هێزەكانی محەمەدی حاجی مەحمود دەستی بەسەرداگیرابوو، لەلایەن هێزەكانی ئاسایشەوە ڕادەستمان كرایەوە و ئەمڕۆش بڕیاربوو كە كوڕەكەم و چەند كەسیكی دیكە بچنەوە ناو ئەو خانووە و پاكی بكەنەوە و جەژن لەوێ بكەن.
ئاماژەی بەوەشكرد، لەگەڵ گەیشتنیان بەخانووەكە لەلایەن هێزەكانی محەمەدی حاجی مەحمود هێرشیان كراوەتە سەر و بە چەكی قورس ڕووبەڕوویان بوونەتەوە لە ئەنجامدا كوڕەكەم و چەند كەسیكی دیكەی ناو خانووەكەم بەسەختی بریندار بوون و لە بارودۆخی تەندروستیان ئاگادارنیم.
عەبدوڵای حاجی مەحمود ئەوەشی خستەڕوو، ئەو خانووە موڵكی تایبەتی خۆمە و لە لایەن ئاسایشەوە ئاگادار كراوینەتەوە كە دەتوانن بڕۆنەوە ماڵەكەی خۆت، بەڵام لەگەڵ گەڕانەوەی كوڕەكەم بە چەكی قورس هێرشیان كراوەتە سەر و بەسەختی كوڕەكەم و چەند كەسیكی دیكە برینداربوون.
