سوپای ئیسرائیل كوژرانی پێنج سەربازی لە باكووری غەززە راگەیاند

SNN

سوپای ئیسرائیل كوژرانی پێنج سەربازی لە باكووری غەززە راگەیاند و ئاشكرایكرد، كە لەسەرەتای هێرشی سەر غەززەوە تائێستا 278 سەربازی كوژراون.

سوپای ئیسرائیل لە راگەیەندراوێكدا دەڵێت، ئەو پێنج سەربازە رۆژی چوارشەممە بە هەڵە لەلایەن سەربازانی خۆیانەوە كوژراون، بەبێ ئەوەی زانیاری زیاتر لەبارەی چۆنیەتی رووداوەكە بڵاوبكاتەوە.

كوژرانی سەربازانی ئیسرائیل لە باكووری غەززە لەكاتێكدایە، سوپای ئەو وڵاتە ماوەی چەند رۆژێكە لە بۆردومانكردنی شارۆچكەی رەفەحی باشووری غەززە بەردەوامە و نەتەوە یەكگرتووەكانیش هۆشداری دەدات لە روودانی كارەساتی مرۆیی بەهۆی بوونی زیاتر لە ملیۆنێك ئاوارە لە شارۆچكەكەدا.

بەگوێرەی ئامارەكانی سوپای ئیسرائیل، لە حەوتی تشرینی یەكەمی ساڵی رابردوەوە 278 سەربازی ئیسرائیلی لە هێرشی سەر غەززەدا كوژراون.