بەڕێوەبەرایەتی کەشناسی هەرێم داتای کەشناسی مانگی پێنجی بڵاوکردەوە

SNN

ئەمڕۆ بەڕێوەبەرایەتی کەشناسی هەرێم داتای کەشناسی مانگی پێنجی بڵاوکردەوە و رایگەیاند، بەراورد بە 30 ساڵی رابردوو مانگی پێنجی ئەمساڵ 2.2 فێنکتر بووە.

ئەمڕۆ یەکشەممە 2ی حوزەیران، بەرێوەبەرایەتی کەشناسی و بومەلەرزەزانی هەرێم، داتای كەشناسی مانگی ئایاری 2024ی بڵاوکردەوە و رایگەیاند، بەپێی داتا تۆماركراوەكانی وێستگەی كەشناسی سلێمانی، لە مانگی ئایاری ئەمساڵدا نزمترین پلەی گەرمی 9.4 پلە و بەرزترین پلە 38.2 پلە تۆماركراوە.

ئاماژەی بەوەکردووە، تێكڕای پلەی گەرمی لە مانگی پێنجدا 21.9 پلە بووە كە بەراورد بە تێكڕای پلەی گەرمی 30 ساڵی ڕابردوو  ئەمساڵ 2.2 پلە  فێنكتر بوو.

هاوکات، بڕی بارانی ئەم مانگە 99.6 ملیمەتر بوو، كە سێ ئەوەندەی تێكڕای ٢٥ ساڵی ڕابردوو باریوە.

سەبارەت بە پلەکانی گەرماش رایگەیاند، بۆ ئەمڕۆ یەکشەممە بە درێژایی کاتەکان ئاسمان ساماڵ دەبێت، پلەی گەرماش بەراورد بە دوێنێ یەک بۆ دوو پلە بەرز دەبێتەوە.

لەبارەی کەشی سبەینێ دووشەممەوە ئاشکرایکردووە، ئاسمان ساماڵ دەبێت و پلەکانی گەرما بەراورد بە تۆمارکراوەکانی ئەمڕۆ یەک بۆ دوو پلە بەرزدەبێتەوە.

لە هەمان کاتدا بۆ ئەمڕۆ بەرزترین پلەی گەرمای ناوچەی هەرێمیش گەرمیان دەبێت کە 43 پلەیە، نزمترین پلەی گەرماش حاجی ئۆمەرانە کە پلەی گەرمییەکەی 26 پلە دەبێت.

بەرزترین پلەکانی گەرمای پێشبینیکراو بە پلەی سیلیزی

هەولێر : 38

سلێمانى: 37

دهۆک :  36

زاخۆ  : 38

هەڵەبجە : 40

کەرکوک: 40

سۆران : 36

حاجی ئۆمەران: 26

گەرمیان : 43