وەزیری کۆچ و کۆچبەرانی عێراق: لە هەولێر و دهۆک رێگە بە فەرمانبەران نادرێت بچنە کەمپی ئاوارەکان
ئیڤان فایەق، وەزیری کۆچ و کۆچبەرانی عێراق | فۆتۆ: ICG
SNN-
وەزیری كۆچ و كۆچبەرانی عێراق رایگه‌یاند، كەمپی ئاوارەكان لە پارێزگای سلێمانی لە 30ی ئه‌م مانگه‌دا دادەخرێت، بەڵام گەڕانەوەی خێزانەكان لە كەمپەكانی دهۆك و هەولێر ئەستەمە، چونکە رێگە بەرفەرمانبەرانی وەزارەتەکەیان نادرێت بچنە ناو کەمپەکە تا رایان وەربگیرێت دەمێننەوە یاخود نا.
ئیڤان فایەق، وەزیری كۆچ و كۆچبەرانی عێراق لە لێدوانێكدا بۆ ئاژانسی هەواڵی عێراقی ڕایگەیاند، “لە 30 مانگی حوزەیرانی ئەمساڵدا کەمپی ئاوارەکان لە پارێزگای سلێمانی بە تەواوی دادەخرێت کە لە ئێستدا تەنها سێ هەزار خێزانی تێدا ماوە”.
دەشڵێت:”لە ئێستادا گەڕانەوەی خێزانەكان لە كەمپەكانی دهۆك و هەولێر ئەستەمە، چونکە هێشتا رێگری هەیە و لەو دوو پارێزگایە و رێگە نادرێت کارمەندانی وەزارەتەکەمان ناتوانن بچنە ناو کەمپەکان بۆ ئەوەی فۆڕمێکی تایبەت بە ئاوارەکان پڕ بکەنەوە کە تێیدا خێزانەکان سەرپشک دەکرێن بۆ گەڕانەوە بۆ ناوچەکانی خۆیان یاخود مانەوە”.
وەزیری كۆچ و کۆچبەرانی عێراق راشیگەیاندووە، وەزارەته‌كه‌ی كەناڵەكانی دیكه بەكاردەهێنێت بۆ پەیوەندیكردن لەگەڵ ئاوارەكان لەڕێگەی فەرمانگەیەكەوە لە پارێزگای دهۆك، بەڵام ئەو پرسە پێویستی بە بونی تیمێك هەیە كە بە بەردەوامی لەناو كەمپەكاندا كاربكات بۆ ئاسانكاری بۆ گەڕانەوەی خێزانەكان بۆ ناوچەكانیان.
