لیستی مووچەی مانگی حەوت ڕەوانەی بەغدا کرا

SNN

لیستی مووچەی مانگی حەوت ڕەوانەی وەزارەتی دارایی عێراق کرا و شاندێکی باڵای هەرێمی کوردستانیش لە بەغدایە.

میدیای پارتی ئەمڕۆ یەکشەممە، 21ی تەمموز رایگەیاند: وەزارەتی دارایی و ئابووریی حکومەتی هەرێمی کوردستان لیستی مووچەی مانگی تەمموز (حەوت)ـی فەرمانبەر، وەزارەتی پێشمەرگە و دامودەزگا ئەمنییەکانی دیکەی ڕەوانەی وەزارەتی دارایی عێراق کرد.

لە ئەمڕۆوە وەزارەتی دارایی عێراق دەست دەکات بە وردبینی لەو لیستەیەی وەزارەتی دارایی و ئابووریی حکومەتی هەرێمی کوردستان بۆی ناردووە.

بە گوێرەی زانیارییەکان، وەزارەتی دارایی عێراق هەوڵ دەدات، هەمان ئەو میکانیزمەی بۆ وردبینی لە لیستی هەردوو مووچەی مانگەکانی ئایار و حوزەیرانی هێزە ئەمنییەکانی هەرێمی کوردستان، جێبەجێ کردووە، بۆ لیستی مووچەی مانگی تەمموزیش بەکار بهێنێت بۆ ئەوەی گرفتی خەرجکردنی مووچەکانیان دووبارە نەبێتەوە.

بەهەمانشێوە لیستی مووچەی خانەنشینان بەهاوتاکراوی بەپێی یاسای خانەنشینی یەکگرتوو ڕەوانەی بەغدا کراوە.

هەر بەگوێرەی زانیارییەکان، ئەمڕۆ یەکشەممە، 21-07-2024، شاندێکی باڵای هەرێمی کوردستان بە سەرۆکایەتیی ئاوات جەناب نووری، وەزیری دارایی و ئابووریی حکوومەتی هەرێمی کوردستان سەردانی بەغدا دەکات بە مەبەستی تاوتوێکردنی مووچەی فەرمانبەران و هێزە ئەمنییەکان، بودجە و چەند پرسێکی دیکە لەگەڵ بەرپرسانی حکوومەتی عێراق و وەزارەتی دارایی فیدراڵی.