زانیارى نوێ له ئێرانه‌وه له‌سه‌ر كوشتنى ئیسماعیل هه‌نیه
ئه‌و میوانخانه‌یه‌ى كه ئیسماعیل هه‌نیه‌ى تێدا كوژرا له تاران | فۆتۆ: ئیرنا
SNN
وته‌بێژى لیژنه‌ى ئاسایشى نیشتمانى و سیاسه‌تى ده‌ره‌وه‌ى ئه‌نجوومه‌نى شوراى ئێران رایده‌گه‌یه‌نێت، هیچ ده‌ستێكى نێوخۆیی رۆڵى نه‌بووه له ئاشكراكردنى شوێنى ئیسماعیل هه‌نیه تاوه‌كو بكرێته ئامانج.
رۆژى پێنجشه‌ممه 1ى ئاب، رۆژنامه‌ى نیویۆرك تایمزى ئه‌مریكى له‌باره‌ى ورده‌كارى كوشتنى ئیسماعیل هه‌نیه، به‌رپرسى مه‌كته‌بى سیاسى بزووتنه‌وه‌ى حه‌ماس راپۆرتێكى بڵاوكرده‌وه و رایگه‌یاند، “هه‌نیه له‌ڕێگه‌ى مووشه‌كه‌وه نه‌كوژراوه، به‌ڵكو له‌ڕێگه‌ى بۆمبى دانراوه‌وه كوژراوه. بۆمبه‌كه چه‌ند مانگێك پێش رووداوه‌كه به نهێنى براوه‌ته ئه‌و شوێنه. له دووره‌وه ته‌قێنراوه‌ته‌وه. ئه‌و میوانخانه‌یه‌ى كه هه‌نیه‌ى تێدا كراوه‌ته ئامانج ده‌كه‌وێته باكوورى تاران و له‌ژێر چاودێرى راسته‌وخۆى سوپاى پاسداراندا بووه”.
له‌و باره‌یه‌وه ئه‌مڕۆ دووشه‌ممه 5ى ئاب، ئیبراهیم ڕەزایی، وته‌بێژى لیژنه‌ى ئاسایشى نیشتمانى و سیاسه‌تى ده‌ره‌وه‌ى ئه‌نجوومه‌نى شوراى ئێران وتى: “هیچ ده‌ستێكى ناوخۆیی رۆڵى نه‌بووه له پیلانى كوشتنى ئیسماعیل هه‌نیه”.
وتیشى: “له كۆبوونه‌وه‌ى یاریده‌ده‌رى فه‌رمانده‌ى فه‌یله‌قى قودسى سه‌ربه سوپاى پاسداران بۆ كاروبارى هه‌واڵگرى، یاریده‌ده‌رى وه‌زیرى ئیتڵاعات و یاریده‌ده‌رى فه‌رمانده‌ى پاسه‌وانى ئه‌نجوومه‌نى شوراى ئێران ئه‌م بابه‌ته به وردى باسكراوه و له كۆبوونه‌وه‌كه‌دا گه‌یشتوون به‌و ئه‌نجامه‌ى ده‌ستى ناوخۆیی رۆڵى نه‌بووه له كوشتنى هه‌نیه”.
به وته‌ى ئه‌و به‌رپرسه‌ى ئێران، “هێشتاش لێكۆڵینه‌وه‌كان به‌رده‌وامیان هه‌یه، به‌ڵام هه‌مووان كۆكن له‌سه‌ر ئه‌وه‌ى هیچ به‌رپرسێك یان ده‌ستێكى ناوخۆیی له‌پشت كوشتنى هه‌نیه‌وه نییه”.
