دوای ڕاگرتنی بۆماوەی سێ ساڵ، تۆماركردنی ناوی نوێ لە فۆڕمی بەشەخۆراك دەستپێدەكاتەوە
SNN-عەلی حەمە سەعید
بەڕێوەبەری بەشەخۆراكی پارێزگای سلێمانی ئاماژە بەوەدەكات، ماوەی سێ ساڵە بە بڕیاری حكومەتی عێراقی ڕاگیراوە بەڵام وا بڕیارە لە ناوەڕاستی ئەم مانگەوە جارێكی دیكە تۆماركردنی ناوی منداڵ و ناوی نوێ بۆ فۆڕمی بەشەخۆراكی مانگانە دەستپێبكاتەوە.
كامەران فاتیح، بەڕێوەبەری بەشەخۆراكی سلێمانی بە SNNی ڕاگەیاند: بەپێی رێنماییەكی حكومەتی عێراق نزیكەی سێ ساڵە ناوی هیچ هاونیشتمانییەك بۆ بەشەخۆراكی مانگانە زیادنەكراوە، بەڵام بڕیارە لە ناوەڕاستی ئەم مانگەوە تۆماركردنی ناوی منداڵی تازە لەدایك بوو دەستپێبكاتەوە، هاوكات فۆڕمی بەشە خۆراكیش دەبیتە ئەلیكترۆنی و ئەوفۆڕمە كاغەزەی ئێستا كاری پێدەكرێت نامێنێت.
ئاماژەی بەوەشكرد، ژمارەی ئەو كەسانەی لە سنووری سلێمانی بەشە خۆراك وەردەگرن، دوو ملیۆن و774 هەزار و129 كەسن، هاوكات ساڵانەش لە نێوان پێنج بۆ هەشت هەزار ناوی نوێ بۆ بەشەخۆراك تۆماردەكرێن و لەبەرامبەردا ناوی سێ بۆ چوار هەزار مردووش دەسڕدرێتەوە.
بەرێوەبەری بەشەخۆراكی سلێمانی ئەوەشی خستەڕوو، تۆمارنەكردنی ناوی نوێ بۆ فۆڕمی بەشەخۆراكی مانگانە بەپێی رێنماییەكی حكومەتی عێراق بوو كە نزیكەی سێ ساڵە ناوی هیچ هاونیشتمانییەك بۆ بەشەخۆراكی مانگانە زیادنەكراوە، هەر بە فەرمانی حكومەتی عێراق دووبارە ئەو پرۆسەیە دەستپێدەكاتەوە.
