ئیسرائیل باری نائاسایی سەرتاسەری راگەیاند

SNN

میدیاکانی ئیسرائیل بڵاویانکردەوە، بەهۆی مەترسی هێرشە مووشەکییەکانی حزبوڵاوە، کابینەی ئەمنی ئەو وڵاتە باری نائاسایی لەسەرتاسەری وڵاتەکە راگەیاندووە.

وەک میدیاکانی ئیسرائیل بڵاویانکردووەتەوە، دوای کۆبوونەوەیەکی درێژخایەنی سەرۆکوەزیران و کابینەی ئەمنی ئەو وڵاتە کە لە وەزارەتی بەرگریی بەڕێوەچوو، بڕیاردراوە باری نائاسایی لەسەرتاسەری وڵاتەکە رابگەیەندرێت.

کەناڵی کانی ئیسرائیلی بڵاویکردەوە، بەم نزیکانە پەرلەمانی ئەو وڵاتە یاسای باری نائاسایی پەسەند دەکات و یائیر لاپید و بنی گانتس سەرکردەکانی ئۆپۆزسیۆنیش رایانگەیاندووە، بە تەواوەتی پشتیوانی لە بڕیارەکانی حکومەت دەکەن بۆ رووبەڕووبوونەوەی حزبوڵا و دابینکردنی ئاسایش و ئارامی بۆ دانیشوانی باکوری ئیسرائیل لە بەهۆی هێرشەکانی حزبوڵاوە ئاوارەبوون.

راگەیاندنی باری نائاسایی سەرتاسەری دوای ئەوەدێت کە بەهۆی هێرشەکانی سوپای ئیسرائیلەوە بۆ سەر باشوری لوبنان، چەندین کەس کوژران و بە سەدانیش برینداربوون، حزبوڵای لوبنانیش هەڕەشەی وەڵامدانەوەی توندی کردووە و پێشبینی دەکرێت کە تەنانەت ناوچەکانی ناوەڕاستی ئیسرائیلیش بکرێنە ئامانجی هێرشە مووشەکیەکانی حزبوڵا.