عەبدولواحید محەمەد: تەنها بەتەوتینكردن كێشەی مووچە كۆتایی دێت
SNN-عەلی حەمە سەعید
سەرۆكی یەكێتیی مامۆستایانی كوردستان ئاماژە بەوەدەكات تەنها بەتەوتینكردن كێشەی مووچە كۆتایی دێت، بۆیە بە هەموو شێوەیەك پشتگیری ئەو بانگەوازە مێژووییەی سەرۆكی یەكێتی دەكەین بۆ كۆتایی هێنان بەكاركردن بە پرۆژەی هەژماری من.
عەبدولواحید محەمەد، سەرۆكی یەكێتی مامۆستایانی كوردستان بە SNNی ڕاگەیاند: لە دوای دەرچوونی بڕیاری دادگای فیدڕاڵی سەبارەت بەمووچە، وەك یەكێتی مامۆستایان باوەڕی تەوامان بەوە هەبوو كە تەنها بەتەوتینكردن كێشەی مووچە كۆتایی دێت، بۆیە بەردەوام داوامان لە هەموو لایەنەكان كردووە، پشت لە هەژماری من بكەن و پشتگیری پرۆسەی بە بانكیكردن لە بانکە حكومیەكان بكەن.
ئاماژەی بەوەشكرد، ئێمە لە یەكێتی مامۆستایان پشتویانی لەو بانگەوازەی ( بافڵ جەلال تاڵەبانی) سەرۆكی یەكێتیی نیشتمانیی كوردستان دەكەین بە ڕەتكردنەوەی پرۆژەی (هەژماری من) و هاوكات پشتیوانی لە تەوتین كردنی مووچەی فەرمانبەران لە بانكە حكومیەكانی سەر بە حكومەتی عێراقی دەكەین، ئەوەش رەنگدانەوەی داخوازیەكانی زۆربەی مامۆستایانە لە هەرێمی كوردستان، چونكە پێیانوایە بە هەژماری من كێشەكان كۆتایی نایێت و هیچ سودیشی لێناكەوێتەوە.
سەرۆكی یەكێتیی مامۆستایانی كوردستان ئەوەشی خستەڕوو، بەتەوتینكردنی مووچەی فەرمانبەران كێشەكانی مووچە كۆتاییان دێت بۆیە كاتی ئەوەهاتووە كە لایەنەكانی دیكەش پشتگیری ئەو بانگەوازی سەرۆكی یەكێتی بكەن بۆئەوەی بە یەكجاری كێشەی پاشەكەوت و لێبڕین و پێنەدان و بەبارمتەگرتنی مووچەی مامۆستایان بۆ بەرژەوەندی تایبەت كۆتایی پێبێت.
