زانیاری نوێ لەسەر دەستگیركردنی نوێنەری مامۆستایانی وانەبێژ لەلایەن ئاسایشی پارتییەوە
مامۆستا عەلی رەئوف
SNN-عەلی حەمە سەعید
لە ترسی ئەنجامدانی خۆپیشاندان و گردبوونەوە، شەوی ڕابردوو هێزێكی تایبەتی ئاسایشی سەر بە پارتی دیموكراتی كوردستان لە قەزای بەردەڕەش، هەڵدەكوتنە سەر ماڵی مامۆستا (عەلی ڕەوف) نوێنەری مامۆستایانی گرێبەست، تا ئێستاش نازاندرێت چارەنووسی چی بەسەرهاتووە و بەبەرچاوی هاوسەر و منداڵەكانیشییەوە سوكایەتی پێكراوە.
بەگوێرەی ئەو زانیارییانەی كە تایبەت بەSNNدراون ئەوە خراوەتەڕوو، كە درەنگانێكی شەوی ڕابردوو بە بێ ئەوەی هیچ فەرمانێكی دەستگیركردنیان پێبێت لە لایەن داگاوە، هێزێكی تایبەتی ئاسایشی پارتی هەڵدەكوتنە سەر ماڵی مامۆستا ( عەلی ڕەوف) نوێنەری مامۆستایانی گرێبەست لە قەزای بەردەڕەش، دوای ئەوەی لەبەرچاوی منداڵ و هاوسەرەكەی بەشیوەیەكی توند مامەڵەی لەگەڵ دەكرێت پاشان بەرەو شوێنێكی نادیار بەڕێدەكرێت.
ئاماژەی بەوەشكرد، تا ئێستا نازانن مامۆستا( عەلی ڕەوف) لە كوێ دەستبەسەركراوە، بەڵام لەكاتی دەستگیركردنی لەلایەن ئەو هێزەی ئاسایشی پارتییەوە ئەوەیان پێڕاگەیاندووە كە ئەم سنورە هی ئەوە نییە هەر كەس بە ئارەزووی خۆی خۆپیشاندان و گردبوونەوە بكات وەك ئەوەی لە سنوری سلێمانی هەیە، بۆیە ناوبراویان دەستگیركردووە.
SNN ئەوەشی زانیوە كە هۆكاری دەستگیركردنی ئەو نوێنەرەی مامۆستایانی گرێبەست بۆ ئەوە دەگەڕێتەوە كە ناوبراو بانگەوازی كردبوو كە سبەی دووشەممە مامۆستایانی گرێبەستی سنووری هەولێر و دەوروبەری گردبوونەوەی ناڕەزایەتی ئەنجام بدەن بۆ داواكردنی مووچەی مامۆستایانی گرێبەست كە تا ئێستا لە هەولێر دابەشنەكراوە و لە سلێمانی دابەشكراوە، هاوكات پشتویانی خۆشیان بۆ مامۆستایانی مانگرتووی سلێمانی دووپات بكەنەوە، بەڵام پارتی ڕێگەی پێنەدان ئەو كارە بكەن.
