کەنەدا و چين دژایەتیى بڕيارەکەی ترەمپ دەکەن

SNN

وەزارەتی بازرگانیی چين لە راگەيەندراوێکدا وتی، “چين قايل نييە و بەتوندی دژی بڕيارەکەيە، لە رێکخراوی بازرگانیی جيهانی سکاڵا لە دژی واشنتن تۆمار دەکات، رێوشوێنی بەرپەرچدانەوەی هاوشێوە بۆ پاراستنی مافەکانمان و بەرژەوەندييەکانمان دەگرينەبەر”.

واشنتن 25%ی باج بەسەر ئەو بەرهەمانەدا دەسەپێنێت کە لە کەنەدا و مەکسیکەوە هاوردە دەکرێن، لەگەڵ باجی 10% لەسەر سەرچاوەکانی وزەی کەنەدا، تاوەکو ئەو کاتەی هەردوو وڵات لەگەڵ ئەمریکا کاردەکەن بۆ بەرەنگاربوونەوەی بازرگانی بە ماددە هۆشبەرەکان و کۆچبەران.

هاوكات، جەستن ترۆدۆ، سەرۆکوەزيرانی کەنەداش ڕايگەياند، بەرهەڵستیی بڕيارەکە دەکەن و ئەوانيش بەرێژەی 25% باج بەسەر کەلوپەلی ئەمريکادا دەسەپێنێت.

ئاماژە بەوەشکراوە، “يەکەم کۆمەڵەی باج بە بەهای زياتر لە 20 مليار دۆلاری ئەمريکی لەسەر کەلوپەلی واشنتن دەبێت و لە رۆژی سێشەممەوە جێبەجێدەکرێت، کۆمەڵەی دووەميش بە بەهای 86 مليار دۆلار دەبێت و لە ماوەی سێ هەفتەدا جێبەجێدەکرێت”.

باجەکە لەسەر ئەو کاڵایانە دەبێت کە رۆژانە ئاڵوگۆڕ دەکرێن، وەکوخواردنەوەکان، ميوە، سەوزە، پلاستيک و زۆر شتی ديکە، کەنەدا و مەکسیک و چین، زیاتر لە 40%ـی هاوردەکردنی ئەمریکا پێکدەهێنن.