ڕۆیتەرز: واشنتن گڵۆپی سەوزی بۆ ئۆپراسیۆنی سوپای سوریا دژی هێزەکانی هەسەدە هەڵکردووە

SNN-

بەگوێرەی ڕاپۆرتێکی ئاژانسی ڕۆیتەرز، دەستبەسەرداگرتنی لەناکاوی ناوچەکانی ژێر دەسەڵاتی هەسەدە لەلایەن سوپای سوریاوە، لە ئەنجامی چەند کۆبوونەوەیەکی نهێنی بووە کە لە سەرەتای ئەم مانگەدا لە دیمەشق، پاریس و عێراق ئەنجامدراون. ڕۆیتەرز ئاماژە بەوە دەکات کە ئەمریکا ڕێگری لەم ئۆپراسیۆنە نەکردووە و چاوی لە ئاست هێرشەکان پۆشیوە، ئەمەش وەک ئاماژەیەک بۆ گۆڕانی سیاسەتی واشنتن بەرامبەر هاوپەیمانە کۆنەکەی.

کۆبوونەوەی پاریس و داواکارییەکانی سوریا لە ئیسرائیل

لە 4ـی کانوونی دووەم، کۆبوونەوەیەکی نێوان بەرپرسانی سوریا و هەسەدە لە دیمەشق بەبێ گەیشتن بە ئەنجام کۆتایی هات. ڕۆژی دواتر شاندێکی سوریا لە پاریس لەگەڵ بەرپرسانی ئیسرائیل کۆبوونەوە؛ لەوێ داوایان لە ئیسرائیل کردووە هانی کوردەکان نەدەن بۆ دواخستنی پڕۆسەی یەکگرتنەوە لەگەڵ سوپای سوریا. لەو کۆبوونەوانەدا، بەرپرسانی سوریا پێشنیازی ئۆپراسیۆنێکی سنوورداریان کردووە بۆ گرتنەوەی بەشێک لە ناوچەکانی ژێر دەستی هەسەدە و هیچ لایەنێک ناڕەزایەتی دەرنەبڕیوە.

نامەکەی تورکیا و مەرجەکانی ئەمریکا بۆ هێرشەکە

سەرچاوەیەکی سوری بە ڕۆیتەرزی ڕاگەیاندووە، حکومەتی سوریا نامەیەکی لە تورکیاوە پێگەیشتووە کە تێیدا هاتووە، واشنتن گڵۆپی سەوزی بۆ ئۆپراسیۆن دژی هەسەدە هەڵکردووە. بەپێی نامەکە، تاکە مەرجی ئەمریکا بۆ ڕەزامەندی دەربڕین لەسەر هێرشەکە ئەوە بووە کە پارێزگاری لە هاووڵاتییانی مەدەنی کورد بکرێت و زیانیان پێنەگات.

هەدیە یوسف: لە ڕێککەوتنی پاریسدا ڕێگە بەم شەڕە درا

هەدیە یوسف، هاوسەرۆکی ئەنجوومەنی جێبەجێکردن لە بەڕێوەبەرایەتیی خۆسەر، پشتڕاستی کردەوە کە ڕێککەوتنە نێودەوڵەتییەکان هۆکاری دەستپێکردنی ئەم هێرشانەن. ناوبراو ڕایگەیاند: “لە ڕێککەوتنەکەی پاریسدا گڵۆپی سەوز بۆ ئەم شەڕە هەڵکراوە”، ئەمەش ئاماژەیە بۆ ئەوەی کە لایەنە نێودەوڵەتییەکان پێشوەختە ئاگاداری پلانەکە بوون.

کۆبوونەوەی هەولێر و گۆڕانی بەرژەوەندییەکانی ئەمریکا

ڕۆیتەرز ئاماژەی بە کۆبوونەوەیەکی ڕۆژی 17ـی ئەم مانگەی نێوان تۆم باراک، نێردەی ئەمریکا بۆ سوریا و بەرپرسانی هەسەدە لە هەولێر کردووە. بەپێی سەرچاوەکان، تۆم باراک بە ڕوونی بە هەسەدەی ڕاگەیاندووە کە لە ئێستادا بەرژەوەندییەکانی ئەمریکا لەگەڵ حکومەتی نوێی سوریا بە سەرۆکایەتی ئەحمەد شەرعدایە، نەک لەگەڵ هێزەکانی سووریای دیموکرات.

دڵنیاییەکانی ئەمریکا بۆ پاراستنی زیندانەکانی داعش

بەرپرسێکی سەربازیی ئەمریکا ڕایگەیاندووە، واشنتن تەنیا لەو حاڵەتەدا دەستوەردان دەکات یان پارێزگاری لە هەسەدە دەکات کە هێرشەکانی سوپای سوریا مەترسی بۆ سەر هاووڵاتییانی مەدەنی یان ئەو گرتووخانانە دروست بکات کە چەکدارانی داعشیان تێدایە. ئەمریکا جەختی کردووەتەوە کە پاراستنی ئەو زیندانانە لە ئەولەویەتی کارەکانیدایە بۆ ڕێگریکردن لە دووبارە سەرهەڵدانەوەی داعش.

نیگەرانییەکانی کۆشکی سپی و ئەگەری سەپاندنی سزا

کاربەدەستێکی کۆشکی سپی بە ڕۆیتەرزی ڕاگەیاندووە، ئەوان بە نیگەرانییەوە چاودێری پێشێلکردنی ئاگربەست لەلایەن هێزەکانی سوریاوە دەکەن. واشنتن هۆشداری داوە کە ئەگەر توندوتیژییەکان دژ بە هاووڵاتییانی مەدەنی کورد بەردەوام بێت، بیر لە سەپاندنەوەی سزا ئابوورییەکان بەسەر سوریادا دەکەنەوە. کۆشکی سپی داوای لە هەموو لایەنەکان کردووە کە پاراستنی گیانی مەدەنییەکان بکەنە کاری لەپێشینەی خۆیان.