موحسین ڕەزایی: تا مافەکانمان بەدی نەیەت دەستبەرداری کۆنترۆڵی گەرووی هورمز نابین

SNN-

موحسین ڕەزایی، یەکێک لە سەرکردە دیارەکانی سوپای پاسدارانی ئێران، لە چاوپێکەوتنێکی تەلەفزیۆنیدا پەیامێکی توند ئاراستەی ئەمریکا و وڵاتانی ناوچەکە دەکات و ڕایدەگەیەنێت، کە وڵاتەکەی بە هیچ شێوەیەک لە مەرجەکانی بۆ دانوستان پاشەکشە ناکات.

کۆنترۆڵی گەرووی هورمز و مەرجەکانی ئێران

ڕەزایی ئاماژەی بەوە کرد، تا ئەو کاتەی مافەکانی ئێران بەتەواوەتی بەدی نەهێنرێت، دەستبەرداری کۆنترۆڵی گەرووی هورمز نابن. جەختیشی لەوە کردەوە کە ئەوان پابەندی 10 مەرجەکەی خۆیانن بۆ دانوستان و وتی: “لە هیچ بارودۆخێکدا لە هیچ کام لە مەرجەکانمان پاشەکشە ناکەین، تەنانەت ئەگەر بە مانای سەپاندنی گەمارۆی دەریایییش بێت.”

ئامادەکاری بۆ شەڕێکی درێژخایەن

ئەو سەرکردەیەی سوپای پاسداران، جیاوازیی نێوان تاران و واشنتنی لە ڕووبەڕووبوونەوەی سەربازیدا ڕوونکردەوە و وتی: “بە پێچەوانەی ئەمریکییەکان کە ترسیان لە شەڕێکی درێژخایەن هەیە، ئێران بە تەواوی ئامادەکاری کردووە و ئەزموونێکی فراوانی لەو جۆرە شەڕانەدا هەیە.”

شکستی هەر هێرشێکی زەمینی

سەبارەت بە دۆخی ئێستای مەیدانی، ڕەزایی ئاشکرای کرد کە ئێستا لە حاڵەتی “ئاگربەست و بێدەنگی سەربازی”دان، بەڵام هۆشداری دا کە لەگەڵ درێژکردنەوەی ئاگربەستەکەدا نییە. وتیشی: “هەر شەڕێکی زەمینی دژ بە ئێران، هەم لە ڕووی تەکنیکی و هەم لە ڕووی سەربازییەوە تووشی شکست دەبێت.”