كوێستانەكانی پێنجوێن، ناوچەیەك بۆ كۆچەرییەكانی شارەزوور و گەرمیان

SNN-عەلی حەمەسەعید
ساڵانە لەگەڵ هاتنی وەرزی گەرما بەشێك لە خاوەن ئاژەڵەكانی شارەزوور و گەرمیان كە بە كۆچەرییەكان ناسراون بەهۆی فێنكیی ناوچەكە و بوونی لەوەڕێكی باشتر، ڕوو لە كوێستانەكانی پێنجوێن دەكەن.

ڕەسوڵ بارام، یەكێك لەو ئاژەڵدارنەی كە لە گەرمای تاقەتپڕوكێنی شارەزوورەوە ڕووی لە كوێستانەكانی پێنجوێن كردووە بە SNNی ڕاگەیاند: ئێمە ساڵانە لەگەڵ هاتنی وەرزی هاوین و بەرزبوونەوەی پلەكانی گەرما، ڕوو لە ناوچەی پێنجوێن دەكەیەن كە بەراورد بە ناوچەكەی خۆمان كەشوهەوایەكی زۆر فێنكی هەیە، بۆ ئەمساڵیش لە ناوچەی (كانی مانگا و سێبواران) دەوارمان هەڵداوە و نیشتەجێ بووین.

ئاماژەی بەوەشكرد، ئامانج لەم كۆچكردنەمان لە گەرمیانەوە بۆ كوێستان، بۆ ئەوەیە لە لایەك ژینگە و كەشوهەوایەكی لەبارتر بۆ ئاژەڵەكانمان فەراهەم بكەین، لە لایەكی دیكەشەوە لەوەڕگایەكی باشتریان بۆ دابین بكەین، بۆیە ساڵانە تا ناوەڕاستی مانگی 10 لەم سنوورەدا دەمێنینەوە و دواتر جارێكی دیكە كۆچ دەكەینەوە بۆ شوێنەكانی خۆمان لە شارەزوور و گەرمیان زۆریش دڵخۆشین بەم كارەمان، چونكە بووتە سەرچاوەی بژێوی ژیانمان.

ئەو كۆچەرییەی ناوچەی شارەزوور جەختی لەوەشكردەوە، كارەكتەری سەرەكی لە ئەنجامدانی گەرمیان و كوێستان و بە خێوكردنی ئاژەڵ، بریتییە لە بەشداری ژنەكانمان، چونكە بە بێ‌ بەشداری ئەوان لەم كارە ئێمە هیچمان پیناكرێت و هەرچیش بكەین سەرناگرێت، چونكە ئەوان لە بەیانی زوودا خەریكی دۆشینی ئاژەڵەكان و كۆكردنەوە و هەڵگرتنی بەرهەمی ئاژەڵەكان دەبن لەگەڵ ئەوەشدا بەردەوام خواردن بۆ خێزانەكەمان ئامادە دەكەن و چاودێری منداڵەكانیش دەكەن.

سەركەوت ناجی، یەكێكی دیكە لەو كۆچەرییانەی كە كاری شوانی ئاژەڵەكانە بۆ SNNی ڕوونكردەوە، كاری من لەم ناوچە كوێستانییە ئەوەیە كە ڕۆژانە لە بەیانییەكی زووەوە ئاژەڵەكانی دەبەم بۆ لەوەڕاندن و نیوەڕوان دەیانهێنمەوە پاش دۆشینیان، دووبارە تا درەنگانێكی ئێوارە دەیانبەمەوە بۆ لەوەڕاندن، زۆریش ئاسودەم بەم كارە، چونكە هەستدەكەم دوورم لە بیستنی هەواڵی ناخۆش كە ڕۆژانە بەرگوێی خەڵك دەكەوێت لە شاروشارۆچەكان، لەگەڵ ئەوەشدا بەم كارە بژێوی خۆمانمان دابینكردووە چاوەڕێی حكومەت ناكەین موچەمان پێبدات، بەڵكو ئێمە توانیویشمانە هاوكاری زۆر كەس بكەین، بۆیە تا لە تواناماندا بێت دەست لەم كارەمان بەرنادەین.