ڕۆژنامەنووس و چالاکوانە دەستگیرکراوەکانی بادینان هێشتا ئازادنەکراون

SNNـ بڕیار محەمەد 

زیاتر لەیەک مانگە چالاكوان و ڕۆژنامەنووسانی سنووری بادینان ئازادنەکراون، دواهەمین دەستگیرکراوانیش گوهدار زێباری ڕۆژنامەنووس‌و شڤان سەعید چالاكی مەدەنی کە هێشتا چارەنووسیان نادیارە .

مێهڤان سەعید بەرۆشکی، برای شڤان سەعید بە SNNی ڕاگەیاند: “لە ساتی دەستگیرکردنی براکەمان تاوەکو ئێستا هیچ زانیاریمان لەسەرشوێن و هۆکاری دەستگیرکردنەکەی نییە و تەنها ئەوەندە دەزانین ئۆتۆمبێلەکان ژمارەیان هەولێر بووە، کەسەکانیش بەجلی مەدەنی و کڵاویان لەسەر بووە نەدەناسرانەوە، پەیوەندیمان بەهەر شوێن کردوە دەڵێن لێرەنییە.

وتیشی:  لە ڕۆژی دەستگیرکردنی تاوەکو ئێستا لەگەڵ رێکخراوە ناوخۆیی و بیانیەکانیش لەهەوڵی بەردەوامداین، بۆئەوەی تەنها بزانین شوێنی لەکوێیە و دۆخی تەندروستی باشە یان خراپە، بەڵام هەموو هەوڵەکان بێ سوود بوون، هیودارین لایەنە پەیوەندیدارەکان زانیاریمان لەسەر دۆخی تەندروستی پێبگەیەنن.

سەرباری ڕەخنەو فشاری ناوخۆیی ‌و ڕێكخراوە نێودەوڵەتییەكان بۆ كۆتاییهێنان بە دەستگیركردن‌ و هەڵكوتانەسەر ماڵی ڕۆژنامەنووس‌و  چالاكوانان، بەڵام حكومەتی هەرێم‌ و دەسەڵاتدارانی بادینان گوێ بە فشارەكان نادەن.