کاریگەرییە ئابوورییەکانی کۆرۆنا تەنها بە ڤاکسینێک کۆتایی نایەت

SNN- هەڵکەوت سەروەت

پاش ئەوەی ڕێکخراوی تەندروستیی جیهانی پشتیوانی جۆرە ڤاکسینێکی کرد کە بۆ چارەسەری کۆرۆنا دۆزراوەتەوە و ئاماژەیدا بە کۆتایی هاتنی ئەو پەتایە و کەمکردنەوەی حاڵەتی ترسناکی ڤایرۆسەکە و دابەزینی نرخی زێر، بەڵام ئابووریناسان پێیان وایە کاریگەرییەکانی کۆرۆنا لەسەر وڵاتان ماوەی چەندین ساڵی دەوێت.

بیلال رەئوف پسپۆری ئابووری بۆ SNNی ئاشکرای کرد: تەنیا هەواڵێکی دۆزینەوەی ڤاکسینی کۆرۆنا کاریگەرییەکی کاتی لەسەر نرخی زێر دروست کردووە، ئەمەش بەهۆی ئەوەی ئیتر سەرمایەدارانی جیهان دەست دەکەن بە کاری پڕۆژە زەبەلاحەکان و کەمێک دووردەکەونەوە لە کڕینی زێر و زیاتر پارەکانیان لە بواری وەبەرهێنان بەکاردەهێنن.

وتیشی “تا کاتی کاریگەری ڤاکسینەکە و بڵاوبوونەوەی چارەسەرەکە لە جیهاندا بەرز و نزمی لە نرخی زێڕدا دەبینین و چارەسەرکردنی کێشە ئابوورییەکانی جیهان بە هۆی کۆڤید 19 پلانی تۆکمە و درێژخایەنی دەوێت”.

بەهۆی بڵاوبوونەوەی ڤایرۆسی کۆرۆناوە کە ماوەی نزیکەی ساڵێک دەبێت ژمارەیەکی زۆر لەهاووڵاتییانی جیهان بێ کاربوون و کارگەیەکی زۆریش داخران و چەندین شوێن مایەپوچی خۆیان راگەیاند و ئابووریناسانیش پێیان وایە گەڕانەوەی جیهان بۆ باری پێشووی خۆی و دۆزینەوەی هەلی کار ماوەیەکی زۆری پێویستە.