کۆبوونەوەى تەواوکارى ڕێککەوتنى شنگال لە هەولێر بەڕێوەچوو

SNN- بڕیار محەمەد 

لە دواى کۆبوونەوەى سێقۆڵى نێوان وەزارەتى ناوخۆی هەرێم و ڕاوێژکارى ئاسایشی نیشتمانى و نەتەوە یەکگرتووەکان تایبەت بە قۆناغەکانى جێبەجێکردنى ڕێککەوتنى شنگال، کۆنگرەیەکى رۆژنامەنووسى بەڕێوە چوو.

رێبەر ئەحمەد وەزیرى ناوخۆی هەرێم رایگەیاند “لە کۆبوونەوەکەدا بڕیاردراوە بەپێی قۆناغەکان ڕێککەوتنەکە جێبەجێبکرێت و سەرەتا دۆخەکە ئاسایی بکرێتەوە و دواتر خاڵەکانی جێبەجێبکرێت”.

لەبارەى قایمقامى شنگال ڕێبەر ئەحمەد وەزیرى ناوخۆی هەرێم وتى: “ئێمە لەگەڵ حکومەتى عیراق ڕێککەوتووین کە قایمقامێکى تازە بۆ شنگال ڕابگەیەنرێت و دواتر ناوەکەشی ڕادەگەیەنین”.

ئاماژەی بەوەشکرد، دەبێ ئیدارە و ئاسایشی شنگال بدرێتەوە شنگالییەکان و هاووڵاتیانى ڕەسەنى شنگالیش بگەڕێنەوە، ڕێککەوتووین لەسەر خشتەیەک بۆ کاتى جێبەجێکردنى ڕێککەوتنەکە و نەتەوە یەکگرتووەکانیش چاودێڕی جێبەجێکردنى دەکات.

دواتر قاسم ئەعرەجى راویژکارى ئاسایشی نیشتمانى وتى: “ئەو کۆبوونەوەیە بۆ نیشاندانى دڵسۆزى بووە بۆ ئەو ڕێککەوتنەى کراوە تایبەت بە جێبەجێکردنى خەڵاکانی”.

وتیشی: “ئەو شوێنە زۆر بەلامانەوە گرنگ و هەستیارە و بۆ ئەوەیە تاوەکو ژیانى مەدەنى بۆ بگەڕێتەوە و خەڵکەکەش بگەڕێنەوە شوێنى خۆیان و تیایدا بژین و هەمووانیش لە ئەماندابن”.

قاسم ئەعرەجی باسی لەوەشکرد کە قبوڵناکرێت لە هیچ هێزێکى چەکدار لە شنگال بمێنێتەوە و دەبێ بچنە دەرەوە و تەنها سوپای عیراقى لەو ناوچەیە دەمێننەوە و هەموو بەرپرسیارەتییەکیان دەبێ.