چەندین كێشە و گرفت ڕووبەڕووی پرۆژەیاسای بودجەی 2021 ى عیراق دەبێتەوە

SNN-عەلی حەمەسەعید
ئەندامێكی لیژنەی دارایی لە ئەنجوومەنی نوینەرانی عێراق ئاشكرایكرد كە وەزیری دارایی بەڵێنیداوە سەرەتای مانگی داهاتوو پرۆژەیاسای بودجەی گشتی عێراق بۆ ساڵی 2021 ڕەوانەی پەرلەمان بكات، بەڵام ئەم پرۆەیاسایەش بەدەرنییە لە بوونی چەندین كێشەو گرفت.

شیروان میرزا، ئەندامی لینەی دارایی لە ئەنجوومەنی نوێنەرانی عێراق بەSNNی ڕاگەیاند: بەدڵنیاییەوە پرۆژەیاسای بودجەی گشتی عێراق بۆ ساڵی 2021 كۆمەڵێك بەربەست ڕووبەڕووی دەبێتەوە هەر لە ئێستاوە چاوەڕێی گەیشتنی پرۆژە یاساكەین بە پەرلەمان و وەزیری دارایی عێراق بەڵێنیداوە كە تا سەرەتای مانگی داهاتوو پرۆژەیاساكە بنێرێتە پەرلەمانی عێراق.

ئاماژەی بەوەشكرد، دڵنیاین لەوەی كە جارێكی دیكە كورتهێنان لەو پرۆژەیاسایەش هەیە، چونكە خەرجییەكانی عێراق زۆر زیاترن لە بڕی داهات لەگەڵ ئەوەشدا نرخی نەوت دابەزینی بەخۆیەوە بینیوە، هاوكات عێراق بەردەوام پێویستی بە پرۆژەی خزمەتگوزاری هەیە ئەوە سەرەڕای ئەوەی كە بەڕێوەچوونی هەڵبژاردنەكانی لەپێشە، بۆیە هەموو ئەمانە دەبنە گرفتی ڕاستەقینە لەبەردەم پرۆژەیاسای بودجەی گشتی عێراق بۆ ساڵی 2021.

ئەو ئەندامەی لیژنەی دارایی لە ئەنجوومەنی نوێنەرانی عێراق ئەوەشی باسكرد، حكومەتی عێراقی بەڵێنیداوە كە ئەو وەرەقە چاكسازییەی بڵاوی كردووەتەوە بەشێكی بخاتە ناو پرۆژەیاسای بودجەی گشتی عێراق و لەناو موازەنەدا جێگەی بكاتەوە، ئەمەش بۆخۆی جارێكی دیكە ڕووبەڕووی گرفتی دەكاتەوە، چونكە كاتێك چاكسازی دەكرێت دەبێت لەبەرژەوەندی چەندین كەس و لایەن بدات، ئەو كەس و لایەنانەش بەئاسانی دەستبەرداری بەرژەوەندییەكانیان نابن گرفت بۆ پرۆژەیاساكە دروستدەكەن ناهێڵن بە ئاسانی لەپەرلەمان تێپەڕێت.