سەرۆکی زێڕەنگەرانی سلێمانی: نرخی زێڕ زیاتر دادەبەزێت

SNN

لە ماوەی پێنج ڕۆژی رابردوودا نرخی زێڕ بەشێوەیەکی بەرچاو دابەزیوە و سەرۆکی زێڕەنگەرانی سلێمانیش پێشبینی زیاتری نرخەکەی دەکات.

دلێر تار محەمەد سەرۆکی زێڕەنگەرانی سلێمانی بە SNNی ڕاگەیاند: ماوەی چەند رۆژێکە نرخی زێڕ بە بەردەوامی رووی لە دابەزینە، بەجۆرێک ئێستا مسقاڵێک زێڕی عەیارە 18 بەرامبەر بە 17دۆلار و عەیارە 21 نزیکەی 21 دۆلاری بۆ هەر مسقاڵێک دابەزیووە و پێشتر نرخی کیلۆیەک زێڕ 60 هەزار و 400 دۆلار بووە و ئێستا 50 هەزار و 620 دۆلارە بۆ کیلۆیەک زێڕی عەیارە 24 بڕی 420 دۆلار کەمی کردووە.

سەرۆکی زێڕەنگەرانی سلێمانی: هۆکاری دابەزینی نرخی زێڕی بۆ دۆزینەوەی ڤاکسینی کۆرۆنا گەڕاندەوە و دەڵێت: پێشبینی دەکەین گەر ڤاکسینەکە کاریگەری باشی هەبێت و بگاتە هاووڵاتیان ئەوا نرخی زێڕ بگاتەوە ئاستی پێشووی کە 30 هەزار و 700 دۆلاربوو بۆ کیلۆیەک.

لەگەڵ دۆزینەوەی چەند ڤاکسینێک بۆ ڤایرۆسی کۆرۆنا نرخی زێر بەبەردەوامی رووی لە دابەزینە و کردنەوەی فڕۆکەخانەکان و جموجوڵی بازرگانی زیاتر لە نرخی زێڕ کەمدەکاتەوە لە جیهاندا.