“کازمی هەوڵ بۆ ڕازیکردنی شیعەکان دەدات تا پارەکەی هەرێم بنێرێت”

SNN- هەڵکەوت سەروەت

سەرۆکوەزیرانی عێراق لە هەوڵدایە لایەنە شیعییەکان رازی بکات بە ناردنی بڕە پارەی هەرێم و رانەگرتنی ناردنی کە بۆ دابینکردنی بەشێک لە مووچەی فەرمانبەرانی هەرێم تەرزانکراوە.

شیروان میرزا ئەندامی پەرلەمانی عێراق بۆ SNN ڕایگەیاند: مستەفا کازمی سەرۆکوەزیرانی عێراق حەز دەکات پارەی هەرێمی کوردستان بنێرێت و ئامادەیی هەیە لە را نەگرتنی ناردنی ئەو بڕە پارەیە، بەڵام دەیەوێت لایەنە شیعەکان رازی بکات و لە هەوڵدایە بۆ چارەسەرکردنی ئەو کێشەیە و گەورەنەکردنی لەلایەن شیعەکانەوە.

ئەو پەرلەمانتارە دەربارەی هەڵبژاردنی داهاتووی عێراق وتی: “حکومەت سوورە لەسەر بڕیارەکەی و کێشەی دابینکردنی بودجە و نەبوونی دوو دادوەری دادگای بیتیحادیش هەیە لەسەر پڕۆسەکە و ئەکرێ چارەسەر بکرێت تا مانگی شەش کە کاتی هەڵبژاردنەکەیە”.

بەوتەی میرزا “دوای چارەسەرکردنی ئەو کێشانەش داواکاری هەڵبژاردنی پێشوەخت دەگەڕێندرێتەوە پەرلەمانی عێراق و گفتوگۆی لەسەر دەکرێ و دواتر لە پەرلەمانەوە بڕیاری ئەنجامدانی هەڵبژاردنی پێشوەختە دەخرێتە بواری جێبەجێکردنەوە”.

بەپێی زانیارییەکانی SNN لەلایەن فراکسیۆنەکانی پەرلەمانەوە هیچ فشارێکی زیاد لە پێویست نییە بۆ ئەنجامدانی هەڵبژادن لەکاتی خۆیدا و گەر ئەو کێشانە و ئامادەکاری کۆسیۆنی هەڵبژاردن چارەسەر نەکرێت، پێناچێت هەڵبژاردنە پێشوەختەکەی عێراق لەکاتی خۆیدا بکرێت.