عه‌دنان عوسمان: سبه‌ى شاندى پارتى دێته‌ سلێمانى و له‌گه‌ڵ گۆڕان و یه‌كێتى كۆده‌بێته‌وه‌

0
208

SNN
وته‌بێژى بزووتنه‌وه‌ى گۆڕان رایده‌گه‌یه‌نێت: داوا ده‌كه‌ین هه‌موو نوێنه‌ره‌كانمان له‌ حكومه‌تى هه‌رێم رێگرى له‌ خۆپیشاندان نه‌كه‌ن، وتیشى: “ئێمه‌ تا ئه‌و رۆژه‌ى له‌ناو حكومه‌تى هه‌رێمداین به‌شێكین له‌ خراپكردنى دۆخى خه‌ڵك”.

ئه‌مڕۆ شه‌ممه‌ عه‌دنان عوسمان، وته‌بێژى بزووتنه‌وه‌ى گۆڕان له‌ كۆنگره‌یه‌كى رۆژنامه‌وانیدا ناوه‌ڕۆكى كۆبوونه‌وه‌ى جڤاتى نیشتمانى بزووتنه‌وه‌ى گۆڕانى ئاشكرا كرد كه‌ ئه‌مڕۆ به‌ڕێوه‌چوو و رایگه‌یاند: “داواى ئه‌وه‌مان كرد وه‌فدێكى باڵاى بڕیار به‌ده‌ست بچێته‌ به‌غدا بۆ ئه‌وه‌ى مه‌سه‌له‌ى مووچه‌ و بودجه‌ یه‌كلا بكرێته‌وه‌، له‌پێناو قوتى ژیانى خه‌ڵكدا”.

وتیشى: ” ئێمه‌ له‌گه‌ڵ ئه‌وه‌ نین رێگرى یاسایی له‌ خۆپیشاندان بكرێت، چونكه‌ خۆپیشاندان مافى خه‌ڵكه‌ و به‌شێكه‌ له‌ پرنسیپى ئێمه‌، هه‌ربۆیه‌ داواكارین هه‌موو نوێنه‌رێكى بزووتنه‌وه‌ى گۆڕان كه‌ له‌ حكومه‌ته‌ رێگرى له‌ خۆپیشاندان نه‌كات‌”.

وته‌بێژى بزووتنه‌وه‌ى گۆڕان له‌باره‌ى جیاوازى هه‌ڵوێستى نێوان په‌رله‌مانتاره‌كانیانه‌وه‌ روونیكرده‌وه‌: “له‌ چه‌ند رۆژى رابردوودا ده‌ستپێشخه‌رییه‌ك كرا له‌نێوان بزووتنه‌وه‌ى گۆڕاندا بۆ ئه‌وه‌ى لیژنه‌یه‌ك پێكبهێنرێت قسه‌ له‌گه‌ڵ سه‌رجه‌م ناڕازییه‌كان بكات، دواتر كێشه‌كان چاره‌سه‌ر بكرێن”.

له‌ به‌شێكى ترى قسه‌كانیدا وته‌بێژى بزووتنه‌وه‌ى گۆڕان له‌باره‌ى به‌رپرسیارییه‌تییه‌كانى حزبه‌كه‌یه‌وه‌ له‌ حكومه‌تى هه‌رێم ئه‌وه‌شى خسته‌ڕوو: “سیاسه‌تى خراپى ئیداره‌دانى حكومه‌تى هه‌رێم له‌ سه‌رجه‌م سێكته‌ره‌كان له‌ رابردوودا دۆخى هه‌رێمى كوردستانى به‌ ئه‌مڕۆ گه‌یاندووه‌، ئێمه‌ش هه‌موومان به‌ حزبى و غه‌یرى حزبى باجه‌كه‌ى ده‌ده‌ین، به‌ڵام ئێمه‌ تا ئه‌و رۆژه‌ى له‌ناو حكومه‌تداین به‌شێكین له‌ خراپكردنى دۆخى هاووڵاتیيان”.

عه‌دنان عوسمان ئه‌وه‌شى ئاشكرا كرد: “سبه‌ى شاندى پارتى دیموكراتى كوردستان دێته‌ شارى سلێمانى و له‌گه‌ڵ یه‌كێتى و گۆڕان كۆده‌بێته‌وه‌”.

 

بەشی بکە لە
Previous Next
Close
Test Caption
Test Description goes like this