داعش له خانه‌قین په‌لامارى گوندێك ده‌دات و پێنج سه‌ربازو هاووڵاتى دەکاتە قوربانى
خانەقین
SNN- سیروان حه‌سه‌ن
له سنوورى خانه‌قین چه‌كدارانى داعش په‌لامارى هێزه‌كانى سوپاى عێراق و گوندێكیانداو بههۆیهوه ئه‌فسه‌رێك كوژراو دوو سه‌ربازو دوو هاووڵاتیش برینداربوون.
شه‌مال عه‌بدولره‌حمان به‌رێوه‌به‌رى ئاسایشى كۆكس به SNNى راگه‌یاند: دره‌نگانى شه‌وى رابردوو چه‌كدارانى داعش له سنوورى گوندى قه‌ڵه‌مه‌ى سه‌ر به قه‌زاى خانه‌قین په‌لامارى هێزێكى سوپاى عێراق و هاووڵاتییانى گوندێكیاندا.
وتیشى، “چه‌كداره‌كان كه به چه‌كى قه‌ناس ته‌قه‌یان له هێزه‌كه‌ى سوپاى عێراق كردوو بههۆیهوه ئه‌فسه‌رێك به پله‌ى مولازم كوژراوه كه ناوى محه‌مه‌د ته‌قییه و دوو سه‌ربازیش برینداربوون”.
ئه‌وه‌شى خسته‌ڕوو، له گه‌ڵ په‌لامارى هێزه‌كه‌ى سوپاى عێراق چه‌كدارانى داعش په‌لامارى هاووڵاتییانى گوندى قه‌ڵه‌مه‌شیان داوه و بههۆیهوه دوو هاووڵاتى برینداربوون و دواى په‌لاماره‌كه‌شیان چه‌كداره‌كانى داعش هه‌ڵهاتوون.
