بۆ بەدەستهێنانی بڕێك داهات شارەوانی هەڵەبجە پەنا بۆ فرۆشتنی زەوی دەبات

SNN-عەلی حەمە سەعید

بەمەبەستی بەدەستخستنی بڕێك داهات و خەرجكردنی ئەو داهاتە لە پرۆژە خزمەتگوزارییەكاندا، سەرۆكایەتیی شارەوانیی هەڵەبجە پارچە زەوییەكی بازرگانی بەڕووبەری هەزار و 320 مەتر دووجا لە زیادكردنی ئاشكرادا دەفرۆشێت و داهاتەكەشی بۆ شارەوانی هەڵەبجە دەبێت.

فەرحان عیزەت، بەرپرسی ڕاگەیاندن لە سەرۆكی شارەوانی هەڵەبجە بە SNNی ڕاگەیاند: دوای ئەوەی لە ماوەی ڕابردوودا وەزارەتی شارەوانی سەرجەم شارەوانییەكانی ئاگاداركردووەتەوە ئەگەر لە سنووری شارەكانیان زەوی بازرگیانیان هەیە دەتوانن بەڕێگەی موزایەدا بیفرۆشن و لە %100 داهاتەكەش بۆ شارەوانی دەگەڕێتەوە، بۆیە ئێمەش لە سنووری شارەوانی هەڵەبجە هیندە زەویمان نییە كە بتوانین هاوشێوەی شارەوانییەكانی سلێمانی و هەولێر بە نرخێكی زۆر بەرز بیفرۆشین ئەوەی هەمانە تەنیا زەوییەكە و خستومانەتە زیادكردنی ئاشكراوە.

ئاماژەی بەوەشكرد، ئێمە زەوییەكمان هەیە كە زەوی بازرگانی بێت كە ڕووبەرەكەی هەزار و 320 مەتر دوجایە و لە لایەن لیژنەیەكی پسپۆروە خەمڵاندن بۆ نرخی زەوییەكە كراوە و بۆ هەر مەترێك 312 هەزار دیناریان دیاریكردووە، زەویەكەش بریتییە لە موڵكی ژمارە (1882/2) كەرتی (1)ی دەوروبەری هەڵەبجە و بەشێوەی زیادكردنی ئاشكرا دەیفرۆشین.

ئەو بەرپرسەی ڕاگەیاندن لە سەرۆكی شارەوانی هەڵەبجە ئەوەشی خستەروو، داهاتی فرۆشتنی ئەو زەوییە لە %100ی بۆ شارەوانی دەبێت و ناگەڕێتەوە بۆ خەزێنەی حكومەت ئەوەش بە پێی ئەو بریارەی كە پێش مانگێك لە لایەن وەزارەتی شارەوانییەوە دەرچوو ئاراستەی سەرجەم شارەوانییەكان كرا.