راهێنه‌ری باسكه‌ی یانه‌ی نه‌وتی باكوور: تیپه‌كه‌مان ئاماده‌كاری باشی هه‌یه بۆ خولی نایابی عێراق
باسکەی یانەی گازی باکوور
حسێن كه‌ركوكی-SNN Sport
یانه‌ی نه‌وتی باكوور دووه‌مین یانه‌ی شاری كه‌ركوكه كه به‌شداری له ركابه‌رییه‌كانی خولی باسكه‌ی نایابی عێراق دەکات كه وا بڕیاره سبه‌ی رۆژی شه‌ممه 19/12/2020 له شاری به‌غداد ده‌ست پێبكات.
سه‌باره‌ت به تیپه‌كه‌یان و ئاماده‌كارییه‌كانیان، محه‌مه‌د ره‌حیم راهێنه‌ری تیپی باسكه‌ی یانه‌ی باكوور بۆ (snn ) وتی:” تیپه‌كه‌مان ماوه‌یه‌كه ده‌ستی به ئاماده‌كارییه‌كان كردووه‌و به‌شداریمان له پاڵه‌وانێتییەکی پاڵاوتن بۆ خولی نایاب كرد”.
وتیشی:” پێكهاته‌كه‌مان پێكهاته‌یه‌كی لاوه له‌گه‌ڵ چه‌ند یاریزانێكی به ئه‌زموونی وه‌ك یاریزان ( شوان ) له ده‌ربه‌ندیخان هه‌روه‌ها له چاوه‌ڕوانی پیشه‌گه‌رێكی لوبنانین كه له به‌غداد بگاته پێكهاته‌ی تیپه‌كه‌مان پێش ده‌ستپێكردنی ركابه‌رییه‌كان”.
هه‌روه‌ها وتیشی:” پێكهاته‌كه‌مان به هۆی ئه‌وه‌ی پێكهاته‌یه‌كی گه‌نجه ، ئاماده‌کاری ده‌كه‌ین بۆ چه‌ند ساڵی داهاتوو،سه‌رجه‌میان له قوتابخانه‌ی باسكه‌ی كه‌ركوك بوون”.
سه‌باره‌ت به رۆڵی تیپه‌كه‌یان له خولی نایابی عێراق ، محه‌مه‌د ره‌حیم وتی:” زۆربه‌ی تیپه‌كانی خوله‌كه ئه‌زموونیان زیاتره له ئێمه ، بۆیه هه‌وڵده‌ده‌ین بێجگە ركابه‌ریكردن سوود له‌م ئه‌زموونە وه‌رگرین”.
له كۆتاییدا ستافی ئیداری هونه‌ری تیپه‌كه‌یان ئاشكراكرد و وتی:” ستافی هونه‌ری پێكهاتووه له به‌نده وه‌كوو راهێنه‌ر و عومه‌ر خه‌لیل یاریده‌ده‌ری راهێنه‌ر و شوان محه‌مه‌د راهێنه‌ری لێهاتووی جه‌سته‌یی و مه‌هدی كه‌مال سه‌رپه‌رشتیار ئیداری”.
