له گه‌رمیان حكومه‌ت و خاوه‌ن كارگه‌كان نرخى غاز وه‌كو خۆى ده‌هێڵنه‌وه و گرانى ناكه‌ن
كارگه‌ى پڕكردنه‌وه‌ى بتڵى غازى ماڵان | فۆتۆ: SNN
SNN – سیروان حه‌سه‌ن
له‌گه‌ڵ گرانبوونى نرخى غاز له به‌شێك له ناوچه‌كانى هه‌رێمى كوردستان، له سنوورى ئیداره‌ى گه‌رمیان لایه‌نى حكومى و خاوه‌ن كارگه‌كانیش بڕیاریاندا نرخى غاز گران نه‌كه‌ن.
هه‌ڤاڵ ئیبراهیم، وته‌بێژى ئیداره‌ى گه‌رمیان به SNNى راگه‌یاند: “دواى گرانبوونى نرخى غاز له به‌شێك له ناوچه‌كانى هه‌رێمى كوردستان به‌هۆى به‌رزبوونه‌وه‌ى نرخى دۆلار به‌رامبه‌ر دینار، جەلال نوری، سه‌رپه‌رشتیارى ئیداره‌ى گه‌رمیان له‌گه‌ڵ لایه‌نى په‌یوه‌ندیدار له حكومه‌ت و خاوه‌ن كارگه‌كانى غاز له گه‌رمیان كۆبووه‌وه”.
وتیشى: “جەلال نوری سەرپەرشتیاری ئیدارەی گەرمیان جەختیکردەوە لە رێگری لە گرانبوونی نرخی غاز لە سنوورەکە و ئەوەی خستەڕوو، گرانبوونی نرخی غاز بارگرانی بۆ ھاووڵاتییان دروستدەکات و ئیدارەی گەرمیان رێگە نادات خاوەنی کارگەکانی غاز لە گەرمیان نرخی غاز گرانبکەن”.
هه‌ڤاڵ ئیبراهیم باسی له‌وه‌شكرد: “لە کۆبوونەوەکەدا بڕیاردرا کارگەکان لەڕێگەی ئەو سەرچاوانەوە غازی شل ھاوردە بکەن کە نرخیان گران نەکردووە و نرخی غاز بە ھەمان نرخی پێشوو بگاتە دەستی ھاووڵاتییان، لای خۆشیانەوە خاوەنی کارگەکان ھاوھەڵوێست بوون لەگەڵ ئیدارەی گەرمیان بۆ ئەوەی غاز بەھەمان نرخی پێشووی بگاتە دەستی ھاووڵاتییان”.
