بەرپرسی لقی پێنجی پارتی لە بەغدا: شاندێکی پارتی لە بەغدایە

SNN

بەرپرسی لقی پێنجی پارتی لە بەغدا رایگەیاند: شاندێکی پارتی بەتەنیا سەردانی بەغدایان کردووە بۆ کۆبوونەوە لەگەڵ لایەنە سیاسییەکان سەبارەت بە پرۆژەیاسای بودجە، دەشڵێت: “لەگەڵ یەکێتی پەیوەندییەکانمان زۆر ئاساییە”.

شوان محەمەد تەها، بەرپرسی لقی پێنجی پارتی لە بەغدا بە SNNی رایگەیاند: ئەمڕۆ شاندەکەی پارتی گەیشتوونەتە بەغدا بەڵام هێشتا کۆبوونەوەکانیان لەگەڵ لایەنە سیاسییەکان دەستیپێنەکردووە و بڕیارە لە سبەینێوە دەستپێبکات.

ئاماژەی بەوەشکرد: “شاندەکەی پارتی بەبێ جیاوازی لەگەڵ لایەنە کوردییەکان لە بەغدا کۆدەبێتەوە”.

سەبارەت بە پەیوەندییەکانی پارتی لەگەڵ لایەنە کوردییەکان، شوان محەمەد تەها رایگەیاند: “لەو بابەتانەدا کە رەهەندێکی نیشتمانی هەیە پەیوەندیمان باشە، پەیوەندیمان لەگەڵ یەکێتی و بزوتنەوەی گۆڕان و هەندێک لایەنی دیکەش زۆر ئاساییە”.

وتیشی: “تەنیا پەیوەندیمان لەگەڵ ئەو لایەنانە باش نیە کە دەیانەوێت قەوارەی هەرێم بچووکبکەنەوە کە ئەوەش بە قازانجی خەڵک کۆتایی نایەت”.

هاوکات سەبارەت بە دۆسێی سوتانی بارەگای پارتی لە بەغدا، ناوبراو وتی: “ئەو کەیسە چەندین قۆناغی یاسایی بڕیووە، ئێمە پارێزەرمان هەیە و سکاڵامان تۆمارکردووە، پێدەچێت ماوەیەکی دیکە دەنگوباسێکی دیکە لەسەر کەیسەکە بڵاوبکرێتەوە”، وتیشی: “سوتانی بارەگاکەمان کردەیەکی سیاسی بوو، بەڵام ئێمە کەس بە دوژمنی خۆمان نازانین”.

ئەمە لەکاتێکدایە پرۆژەیاسای بودجە لە پەرلەمانی عێراق خوێندنەوەی یەکەمی بۆکراوە. پێشتریش شیروان میرزا پەرلەمانتاری یەکێتی و ئەندامی لیژنەی دارایی عێراق بە SNNی وت: “لە هەوڵداین کۆدەنگی لایەنەکان لەسەر پرۆژەیاسای بودجە دروستبکەین”.