سەرۆکایەتی یەکێتیی: تەئکید لە جێبەجێکردنی لامەرکەزیی دەکەینەوە لە چوارچێوەی ڕێککەوتنمان لەگەڵ پارتی

SNN

هاوسەرۆکانی یەکێتیی جەختدەکەنەوە لەسەر پێویستیی خستنەگەڕی هەوڵەکان بۆ چارەسەرکردنی کێشەکان لەپێناو دابینکردنی ژیانێکی شایستە بۆ هاووڵاتیان و پاراستنی ئارامی ناوچەکە.

هاوکات ئامادەیی یەکێتیی نیشتمانیی کوردستانیشیان دووپاتکردەوە بۆ کاری هاوبەش و پێکەوەیی و پاراستنی یەکڕیزیی لەنێوان هێز و لایەنەکان.

ئەمڕۆ سێشەممە بافڵ تاڵەبانی، لاهور شێخ جەنگی هاوسەرۆکانی یەکێتیی نیشتمانیی کوردستان لە شاری سلێمانی پێشوازییان کرد لە ڕۆب واڵەر کونسوڵی گشتیی ئەمریکا لە هەرێمی کوردستان و وەفدی هاوڕێی.

هەردوولا بارودۆخی سیاسی و ئابووری و ئەمنی و پرسی هەڵبژاردنی پێشوەختەیان لە هەرێمی کوردستان و عێراق تاوتوێ کرد لەبەر ڕۆشنایی پێشهات و ڕووداوەکانی ئێستا و پێویستی بەردەوامبوونی هەوڵەکانیش دووپات کرایەوە بە ئامانجی سازکردنی دیالۆگی جددی و لابردنی بەربەستەکان.

هاوسەرۆکانی یەکێتیی جەختیانکردەوە لەسەر پێویستیی خستنەگەڕی هەوڵەکان بۆ چارەسەرکردنی کێشەکان لەپێناو دابینکردنی ژیانێکی شایستە بۆ هاووڵاتیان و پاراستنی ئارامی ناوچەکە.

تەئکیدیشیان لە جێبەجێکردنی سیستمی لامەرکەزیی کردەوە لە چوارچێوەی ڕێککەوتنیان لەگەڵ پارتی دیموکراتی کوردستان بۆ بەشداریکردنی لە حکومەت، هاوکات بە خاڵێکی گرنگیان لە قەڵەمدا بۆ بەهێزکردنی حکومەت و پاراستنی زیاتری قەوارەی هەرێمی کوردستان و زیاتر خزمەتکردنی هاووڵاتیان و پێشکەشکردنی خزمەتگوزاریی زیاتر و باشتر بەسەرجەم پارێزگاکانی هەرێم.

ئامادەیی یەکێتیی نیشتمانیی کوردستانیشیان دووپاتکردەوە بۆ کاری هاوبەش و پێکەوەیی و پاراستنی یەکڕیزیی لەنێوان هێز و لایەنەکان.

هاوسەرۆکانی یەکێتیی داوایان لە ویلایەتە یەکگرتووەکانی ئەمریکا کرد کە ڕۆڵی خۆی ببینێت لە لێکنزیککردنەوەی بیروبۆچوونی لایەنەکان و یەکلاکردنەوەی کێشەکان لەپێناو تێپەڕاندنی ئەم قۆناغە و کۆتاییهێنان بە کێشە هەڵپەسێردراوەکانی نێوان حکومەتی هەرێم و حکومەتی فیدراڵی لە سەر بنەمای دەستوور بە جۆرێک کە مافەکانی هاووڵاتیانی تێدا پارێزراو بێت و چیتر ڕێگە نەدرێت قوت و بژێوی ژیانی هاووڵاتیان تێکەڵ بە کێشە و ململانێ سیاسییەکان بکرێت و ژیان و گوزەرانی خەڵک پارێزراو بێت.

کونسوڵی گشتی ئەمریکا ئامادەیی وڵاتەکەی دووپاتکردەوە بۆ بەردەوامیی هەوڵەکان و یارمەتیدان و هاوکاریکردنی لایەنەکان بۆ دۆزینەوەی چارەسەری گونجاو و ڕێککەوتنی کۆتایی لەنێوان حکومەتی هەرێم و حکومەتی فیدراڵ.

راشیگەیاند کە وڵاتەکەی لە ڕووی پێداویستی پزیشکی و کەرتی تایبەتەوە هاوکاری هەرێمی کوردستان دەکات.