پەرلەمان و حکومەت کار بۆ باشکردنی مووچەی خانەنشینی هێزەکانی ناوخۆ دەکەن

SNN

ئه‌ندامێكى لیژنەی ناوخۆی پەرلەمانی کوردستان دەڵێت: “ئامادەسازی بۆ پڕۆژەیاسایەك دەکرێت، كە تایبەتە بە خانەنشینیی ھێزەکانی ناوخۆ و ئاسایش و یەکەی پاسەوانییەکانیش لە چوارچێوەی فەرمانگەیەکدا کۆدەکرێنەوە”.

ئەرشەد لۆلانی، ئەندامی لێژنەی ناوخۆ و ئاسایش لە پەرلەمانی كوردستان بە SNNی ڕاگەیاند: “پاش کۆبوونەوەی جێگری سەرۆکی پەرلەمان و لیژنەی ناوخۆ و ئاسایش و ئەنجوومەنە خۆجێیەکان، لەگەڵ وەزارەتی ناوخۆ پرسی ناردنی هێز بۆ دەروازەکان و یەکەی پاسەوانی و مووچەی خانەنشینیی هێزەکانی نوخۆ تاوتوێکران”.

وتیشی: “لەسەر پێکھێنانی ئەو ھێزە ھاوبەشەی لە ھەردوو وەزارەتی ناوخۆ و پێشمەرگە بڕیارە بچێتە دەروازە سنوورییەکان قسە و باس کراوە کە بۆ بنبڕكردنی قاچاغچێتى دەچنە سنوورەکان”.

باسی ئەوەشیکرد کە یەکەكانی پاسەوانی لە یەك یەكەی پاسەوانی گشتیدا جێگە دەکرێتەوە و چاوەڕێی وەزارەتی ناوخۆ دەکەین بۆ نووسینەوەی پەیڕەوێك لەوبارەیەوە.

بەوتەی لۆلانی، مووچەی کارمەندی ناوخۆ پاش خانەنشین بوونی زۆر کەمە، بۆیە پرۆژەیاسایەک ئامادە دەکرێت تا مووچەکەیەن بگەیەنرێتە ئاستێک لە ئاست خزمەت و بژێوی و ماندووبوونیاندا بێت”.

ئاشکراشیکرد “كار بۆ ڕێكخستنەوەی كۆمپانیاكانی تایبەت بە پاسەوانی لە چوارچێوەی یاسایەكدا ده‌كرێت کە لەلایەن وەزارەتی ناوخۆوە پەیڕەوێکی بۆ دادەنرێت”.