لەسەر پشکی هەرێم لە بودجەدا سەرۆککۆمار لەگەڵ شاندی هەرێم و فراکسیۆنە کوردستانییەکان کۆبووەوە

SNN

سەرۆککۆمار لەگەڵ شاندی هەرێم و بەشێک لە فراکسیۆنە کوردستانییەکان کۆبووەوە و پاراستنی مووچەی مووچەخۆران و بژێوی ژیانی خەڵکی ھەرێمی کوردستان وەک سەرجەم ھاووڵاتیان دیکەی عێراق بێ جیاوازی جەختی لێکرایەوە.

ئێوارەی ئەمڕۆ، د. بەرھەم ساڵح، سەرۆککۆماری عێراق لە بەغدا پێشوازیکرد لە قوباد تاڵەبانی، جێگری سەرۆکوەزیرانی ھەرێمی کوردستان و سەرۆکی شاندی دانوستانکاری ھەرێم بۆ بەغدا و بەشیر حەداد، جێگری دووەمی سەرۆکی پەرلەمانی عێراق و فراکسیۆنە کوردستانییەکان، پارتی دیموکراتی کوردستان و یەکێتیی نیشتمانیی کوردستان و هاوپەیمانی هیوای کوردستانی لە پەرلەمانی عێراق و لەبارەی دوایین گۆڕانکارییەکانی دانوستانی نێوان ھەرێمی کوردستان و حکومەتی فیدراڵ گفتوگۆ کرا.

لە کۆبوونەوەکەدا بەگرنگییەوە جەختکرایەوە لەگەییشتن بە رێگاچارەی گونجاو و بنەڕەتی بۆ کۆتاییھێنان بە کێشە ھەڵپەسێردراوەکانی نێوان ھەردوو حکومەتی ھەرێمی کوردستان و حکومەتی فیدراڵ لەسەر بنەمای دەستوور و یاسا و پاراستنی مووچەی مووچەخۆران و بژێوی ژیانی خەڵکی ھەرێمی کوردستان وەک سەرجەم ھاووڵاتیان دیکەی عێراق بێ جیاوازی.

لە بەشێکی دیکەی کۆبوونەوەکەدا دووپاتکرایەوە لە پێویستی کۆتاییھێنان بەقەیرانی مووچە و کەمکردنەوەی لێکەوتە داراییەکان لەسەر خەڵک، ھاوکات بیروڕا ئاڵوگۆڕکرا سەبارەت بە پشکی ھەرێمی کوردستان لە بودجەی گشتی ساڵی 2021 و زامنکردنی مافی تەواوی ناوچە و پێکھاتەکان لەسەر بنەمای دادپەروەری و پاراستنی مافی سەرجەم ھاووڵاتیانی عێراق و ھەرێمی کوردستان و جیاکردنەوەی مووچەی خەڵکی کوردستان لە ململانێی سیاسی و کێشمەکێش.