پێدەچێت جۆرێکی ڤاکسینی کۆرۆنا بۆ کەسانی سەروو 65 ساڵ مەترسیداربێت

SNN

ئەڵمانیا دەستی بە دابەشکردنی ڤاکسینی کۆرۆنا لە جۆری ئەسترازینێکا کردووە بەسەر هاووڵاتیانی وڵاتەکەدا بەڵام ڤاکسینەکە نادرێتە کەسانی تەمەن سەروو 65 ساڵ چونکە ئەگەری هەیە مەترسی بۆ تەندروستییان دروستبکات.

لیژنەیەکی حکومی تایبەت بە دابەشکردنی ڤاکسین لە ئەڵمانیا بەناوی STIKO رایگەیاندووە، تا ئێستا زانیاری پێویست کۆنەکراوەتەوە لەبارەی کاریگەرییەکانی ڤاکسینی ئەسترازینێکا لەسەر کەسانی تەمەن سەروو 65 ساڵ، بەڵام ئەو توێژینەوانەی کە هەبوون دەریخستوون ڤاکسینەکە بۆ کەسانی تەمەن 18 بۆ 65 ساڵ سەلامەتە.

میدیای ئەڵمانیا ئەوەی بڵاوکردووەتەوە، زانکۆی ئۆکسفۆرد کە ڤاکسینی ئەسترازینێکا-ی گەشەپێداوە، ئێستا لە تاقیگەکانیدا کار لەسەر ڤاکسینەکە دەکات بۆ ئەوەی بتوانرێت بۆ کەسانی تەمەن سەروو 65 ساڵیش بەکاربهێندرێت.

ئەمە لەکاتێکدایە یەکێتی ئەوروپا داوای کڕینی 300 ملیۆن ژەمە ڤاکسینی ئەسترازینێکای کردووە.