وەزارەتی تەندروستیی عێراق: رەنگە قەدەغەی گشتی رابگەیەنینەوە

SNN

وەزارەتی تەندروستیی عێراق هۆشداریی دەدات لە هاتنەوەی شەپۆلێکی توندی کۆرۆنا و دەڵێت: “رەنگە قەدەغەی گشتی یان نیمچەیی رابگەیەنینەوە”.

لە بەیاننامەیەکدا وەزارەتەکە دەڵێت: “نابێت هاووڵاتی پشت بەو کەمبوونەوەیە ببەستێت کە تارادەیەک لە ژمارەی تووشبوون و مردن بە کۆرۆنا هاتووەتە ئاراوە”.

وەزارەتی تەندروستیی عێراق راشیدەگەیەنێت: “بەرزبوونەوەی ژمارەکانی تووشبوون لە دوو هەفتەی رابرردوودا ئاماژەیەکی ترسناکمان دەداتێ و شەپۆلی ئەمجارە زۆر بەهێزتر دەبێت بەتایبەت دوای هاتنە ئارای رەگەزی بەریتانی و ئەفریقی ڤایرۆسەکەوە”.

دەشڵێت: “ئەم هۆکارانە وامان لێدەکات هەوڵ بدەین قەدەغەی گشتی یان نیمچەیی لە هەندێک لە کایەکانی ژیان و شوێنە قەرەباڵغەکان رابگەیەنینەوە”.

یەكەم حاڵەتی نەوەی نوێی كۆرۆنا، بۆ یەكەمجار لە مانگی 9ی 2020 لە وڵاتی بەریتانیا تۆمار كرا، دواتر رێژەی تووشبوون لەو وڵاتە زیادیكرد و بۆ چەند وڵاتێكی دیكە گوازرایەوە، چەندین وڵاتیش گەشتە ئاسمانییەكانیان لەگەڵ بەریتانیا راگرت و لەناو خۆی بەریتانیاش قەدەغەی ھاتووچۆ راگەیەندرا.