رێبەر ئەحمەد: پرسی ناردنی هێز بۆ دەروازە سنوورییەکان گۆڕانی بەسەردا هاتووە

SNN

رێبەر ئەحمەد وەزیری ناوخۆی هەرێم رایگەیاند “بەداخەوە ئامارەکانی تووشبوون بە ڤایرۆسی کۆرۆنا لە هەرێمی کوردستان لە هەڵکشاندایە”. وتیشی: “پرسی ناردنی هێز بۆ دەروازە سنوورییەکان گۆڕانی بەسەردا هاتووە”.

وەزیری ناوخۆ لە کۆنگرەیەکی رۆژنامەوانیدا لەبارەی دەستبەکار بوونی ئومێد خۆشناو وەک پارێزگاری هەولێر وتیشی: “ئەرکێکی قورس رووبەڕووی پارێزگاری هەولێر بووەتەوە و وەک حکومەتی هەرێمی کوردستان پشتیوانیی دەکەین”.

لای خۆیەوە ئومێد خۆشناو پارێزگاری هەولێر وتی: “وەک تیمێک پێکەوە لەگەڵ فەرمانگەکانی سنووری پارێزگا کار دەکەین و بە ئەمانەتەوە کار دەکەم”.

وەزیری ناوخۆ وتیشی: “ئەمڕۆ کاتژمێر 2.30 کۆبوونەوەی لیژنەی باڵای کۆرۆنا دەبێت و لەسەر بنەمای داتاکانی وەزارەتی تەندروستیی بڕیاری گونجاو دەدەین”.

سەبارەت بە گاەڕانەوەی ئاوارەکانیش کە میدیای عێراقی باسی ئەوەیکردووە حکومەتی هەرێم رێگرە لە گەڕانەوەیان، وەزیری ناوخۆ وتی: “هەرێمی کوردستان هۆکاری ئاوارەبوونی ئەو خەڵکە نەبووە و رەتیدەکەینەوە رێگر بین لە گەڕانەوەیان و تائێستا لەکۆی 2 ملیۆن و نیو ئاوارە، زیاتر لە ملیۆن و نیوێکیان گەڕاونەتەوە”.

رێبەر ئەحمەد وتیشی: “پرسی ناردنی هێز بۆ دەروازە سنوورییەکان لەئێستادا دواخراوە و حکومەتی هەرێم پێیباشە رێگەیەکی دیکە بدۆزێتەوە بۆ چارەسەری ئەو پرسە و داوای کاتی زیاتر کراوە بۆ ئەو مەبەستە”.