دوای ماوەیەک لە بچڕانی، بەشێکی ئەمریکا وزەی کارەبای بۆ گەڕایەوە

SNN

کۆمپانیای Entergy بۆ وزە لە ویلایەتی تەکساس رایگەیاند “دوای هەفتەیەک لەو شەپۆلە سەرمایەی سنوورەکەی گرتبووەوە یەکەکانی پێدانی کارەبا دەستیانکردووەتەوە بە ئیشکردن”.

لە بەیاننامەیەکدا کۆمپانیاکە رایگەیاندووە “لە رۆژی شەممەوە کۆمپانیاکە توانیوێتی گرفتی نەبوونی کارەبا چارەسەر بکات کە بەهۆی سەرماوە ویلایەتی تەکساس و بەشێکی وڵاتەکەی بێ کارەبا کردبوو”.

کۆمپانیاکە دەشڵێت: “زیاتر لە 1000 کارمەند بەردەوام کاریانکردووە بۆ گێڕانەوەی کارەبا بۆ هاووڵاتییانی ویلایەتەکە و گرفتەکە بەتەواویی چارەسەر کراوە”.

ماوەی هەفتەیەک زیاترە ژمارەیەک ویلایەتی ئەمریکا کە کەشیان بەشێوەیەکی بەردەوام گەرمە، سەرما و سۆڵەیەکی زۆر دایگرتوون و هێڵەکانی کارەبا و ئاوی بڕیبوو لە دانیشتوانەکەی و زیاتر لە 60 کەسیش سەرما رەقیکردبوونەوە.

هەفتەی رابردووش جۆو بایدن سەرۆکی ئەمریکا ویلایەتی تەکساسی بە ناوچەی کارەساتبار لەقەڵەمدا و بڕیاریدا کامپی کاتی بۆ زیانمەندان دابنرێت تا لە سەرما پارێزراو بن و قەرەبووی ماددی بکرێنەوە.